«Ինձ ասեց մա՛մ, ես քո տաս դրամը չեմ ուզում, գնա՛ ես իմ պատիժը կկրեմ».ոստիկանին սպանած անչափահաս տղայի մայրը մանրամասնում է

ԿՐԻՄԻՆԱԼ 

«Ես ինձ մեղավոր չեմ համարում, որ տղաներս հասել են նրան, որ մարդու վրա են կրակել, ինչի համար մեղավոր զգամ»,- NewsMedia-ի հետ զրույցում անդրադառնալով հոկտեմբերի 16-ին ոստիկանին սպանած (16 եւ 18 տարեկան տղաների կողմից) կատարված հանցանքին, ասաց վերջիններիս մայրը` Ռիտա Գալստյանը, ով դատապարտվել էր հենց ոստիկանի վրա կրակած 16-ամյա տղային դանակահարելու փաստով:

-Այսինքն, բացթողումներ Ձեր մեջ չեք տեսնո՞ւմ, որ ժամանակին, որպես մայր, ուշադրություն չեք դարձրել Ձեր տղաների դաստիարակությանը: Որ թողել եք բախտի քմահաճույքին, որ դուք ինքներդ դանակահարել եք Ձեր որդուն: Այս դաժան իրականությունը հաշվի առնելով՝չունե՞ք մեղքի զգացում…

-Լսի ջիգյար, ես ինձ մեղավոր գիտեք ինչի համար եմ մենակ զգում, որ չեմ ուզում իմ էրեխեքը դատվեն, իմ էրեխեքը սխալ չեն եղել, զենքը խիա զարիժատ եղել, կասեք՝ իմանամ… ուզում ա ինձ սատկացնեն, ուզում ա ինձ դատեն, բայց ես ասելու եմ:

-Տիկին Ռիտա, իսկ ինչո՞ւ էին Ձեր տղաները այդ ժամին դրսում, ինչո՞ւ էիք նրանց թողել բախտի քմահաճույքին:

-Սուտ են խոսում, ես չգիտեմ ինչ-ինչ են ներկայացրել, բայց ես լիքը խիստ եմ եղել: Ես էն մայրն եմ, որ իմ մի մատ էրեխեքին բռնել եմ տվել, միլիցեքի ձեռն եմ տվել: Բա ինչի ոչ մի բան չեն արել, որ ուղղվեն:

-Իսկ դուք, չե՞ք համարում, որ դուք էլ եք թերացել, քանի որ տղաները այսպես ասած՝լավ ճանապարհով չեն գնացել:

-Չգիտեմ, մանկատնից, թե որտեղից են սովորել, ի՞նչ իմանամ, սոված են մնացել:

-Իսկ ինչո՞ւ են տղաները  հայտնվել մանկատանը:

-Խփել եմ էրեխուս՝ հարսիս պատճառով:

-Այսի՞նք, ի՞նչ հարսի պատմություն …

-Եկավ, ասեց Հրաչը իմ էրեխուն խփելա դանակով, ես էլ հղի վիճակում գնացի ու դանակը կոխեցի էրեխուս սիրտը, որ իմանա ինչ բան ա մորը ցավացնելը, ես չեմ ուզում դրա մասին հիմա խոսեմ, վերջ:

-Լավ, իսկ հիմա փորձել եք կալանավայրում հանդիպել Ձեր տղաներին:

-Հա Սարգիսին, (նկատի ունի 18 տարեկան տղային )` չտեսա, բայց Հրաչին(նկատի ունի ոստիկանի վրա կրակողին) տեսել եմ:

-Ինչ էր պատմում Հրաչը, եւ առհասարակ ներե՞լ է նա Ձեզ արդյոք:

-Հա բա ինչ ա արել:

-Ի՞նչ ասաց, զղճում է՞ր կատարվածի համար:

-Էն էլ ոնց… ինձ ասեց մամ, ես քո տաս դրամը չեմ ուզում, գնա ես իմ պատիժը կկրեմ, ինչ ասեմ. երկուսն էլ հոգեկան հիվանդ են, նրանք ո՞նց կարան պատիժ կրեն… Գիտեք, ուզում եմ գնամ սպանված ոստիկանի հարազատներին տեսնեմ, ներողություն խնդրեմ, բայց վախում եմ, թե չէ էս էդ մարդը չեմ…

Հիժեցենք, որ հոկտեմբերի 16-ին` ժամը 04:20-ին, «Սուրբ Գրիգոր Լուսավորիչ» բժշկական կենտրոնից հաղորդում է ստացվել այն մասին, որ «կենսաբանական մահ, հրազենային վերք ձախ բազկի շրջանում» ախտորոշմամբ իրենց մոտ բուժօգնության են տեղափոխվել 1981 թվականին ծնված Տիգրան Առաքելյանը և «գանգի գագաթային շրջանի պատռվածք վերք ախտորոշմամբ» 1994 թվականին ծնված Ա. Հակոբյանը:

Անմիջապես դեպքի վայր է մեկնել քննչական-օպերատիվ խումբ: Պարզվել է, որ հիվանդանոց տեղափոխված անձինք ՀՀ ոստիկանության ծառայողներ են, ովքեր նույն օրը՝ ժամը 03:40-ի սահմաններում, իրենց ծառայությունը կատարելու ընթացքում, «Հաղթանակ» զբոսայգու մուտքի մոտ նկատել են երկու անձի։ Վերջիններս, տեսնելով պարեկային մեքենան, դիմել են փախուստի։ Ոստիկանության ծառայողները հետապնդել են նրանց և Ազատության պողոտայում բռնել։ Բռնված անձինք փորձել են դիմել փախուստի, որի ժամանակ նրանցից մեկը հափշտակել է ոստիկաններից մեկին ամրակցված զենքը, հարվածել Ա.Հակոբյանի գլխին և կրակել Տ.Առաքելյանի ձախ բազկին, ով ստացած մարմնական վնասվածքներից մահացել է:
Դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով և 104-րդ հոդվածի 2-րդ մասի 2-րդ կետով: Կազմվել է քննչական խումբ, մշակվել քննչական պլան:
Կատարվել է դեպքի վայրի զննություն, որի ժամանակ հայտնաբերվել են 1 հատ պարկուճ և 1 փամփուշտ, արնանման հետքեր, վերցվել փորձանմուշներ: Առգրավվել են մահացածի հագին դեպքի պահին եղած հագուստները, որոնց վրա առկա են եղել արնանման հետքեր: Քրեական գործով էական նշանակություն ունեցող հանգամանքներ պարզելու նպատակով նշանակվել են փորձաքննություններ:

Պատրաստեց՝ ՆՈՆԱ ԱԴԱՄՅԱՆԸ 

NewsMedia.am

Լուրեր Հայաստանից, եւ աշխարհից