Խառը ամուսնությունների դեպքում, իրականում ադապտացիայի պրոցեսները շատ-շատ բարդ է, իսկ ինչ վերաբերում է երկքաղաքացիություն ստանալուն, ապա...

Վերջին շրջանում կարծես թե ավելացել է այն հայուհիների թիվը, որոնք ամուսնանում են այլազգիների հետ: Մասնավորապես քիչ չեն դեպքերը, երբ մեր աղջիկները ընտանիք են կազմում մահմեդական երկրի ներկայացուցիչների հետ: Եւ թե ինչու են հայ աղջիկները նախընտրում օտարազգիների հետ ամուսնանալու հեռանկարը, ի՞նչ խնդիրների առաջ կարող են կանգնել հետագայում նմանօրինակ ընտանիքները, NewsMedia.am-ը փորձեց հետաքրքրվել հայտնի հոգեբան ԿԱՐԻՆԵ ՆԱԼՉԱՋՅԱՆԻՑ, ով անդրադառնալով նախ պատճառներին, ասաց.

-Եթե Հայաստանում երիտասարդը գիտակցի, որ կարող է իր երկրում արժանապատիվ ապրել, օտարների հետ ամուսնանալու միտումները կմիանշանակ նվազեն։Ընդհանրապես էթնիկական տեսակետից ՝ տարբեր ազգերի ներկայացուցիչների ամուսնությունները չափազանց ռիսկային են: Որովհետեւ այստեղ շատ-շատ լուրջ խնդիրներ են ի հայտ գալիս: Թվում է, թե բոլոր ամուսնություններն էլ՝ սիրո վրա հիմնված կապ են, եւ եթե կա սեր նշանակություն չունի, թե ինչ ազգերի ներկայացուցիչներ են ամուսնանում:

Բայց չէ ո՞ր, ամուսնությունը նաեւ կենցաղ է, որտեղ տան պատերի ներսում մշակությային բախման երեւույթները ուղղակի անտեսել չի կարելի: Կինը եւ ամուսինը տարբեր մշակույթներ ներկայացնելով՝ մի տեսակ սիմվոլացնում են իրենց մշակույթները, որոնք կարող են բախման մեջ մտնել: Խառը ամուսնությունների դեպքում, իրականում ադապտացիայի պրոցեսները շատ-շատ բարդ է: Հետո, շատ կարեւոր է, թե ինչ ազգերի ներկայացուցիչներ են միմյանց հետ ընտանիք կազմում:

-Ի՞նչ խնդիրների առաջ կարող են կանգնել այն հայ կանայք, ովքեր ամուսնանում են պարսիկների, իրանցիների եւ առհասարական մուսուլմանական երկրի ներկայացուցիչների հետ:

-Չափազանց մեծ խնդիրների առաջ կարող են կանգնել: Մահմեդականությունը՝ մշտապես իրենը դարձնելու հակում ունի: Այնպես որ, որեւէ հայ աղջիկ, ով իրեն շատ խորը քրիստոնյա է զգում, այնուամենայնիվ չպետք է ամուսնանա մահմեդական մշակույթի ներկայացուցչի հետ: Ինքը ստիպված է լինելու թե՛ հոգեպես, թե՛ վարքով, թե՛ հավատքի առումով հպատակվի մահմեդականությանը: Մահմեդական մշակույթի ներկայացուցիչների հետ հայ աղջիկների ամուսնությունը հղի է չափազանց մեծ ռիսկերով: Օտարազգի ներկայացուցիչների հետ ամուսնությունների հիմնական պատճառն այն է, որ Հայաստանում երիտասարդները անելիք չունեն, իսկ օտարի հետ ամուսնությունը, ըստ իրենց` երկրից դուրս գալու ամենալավ ձևն է:

Ի դեպ,  վեր բարձրացրած խնդրի շրջանակներում,  Հայաստանի Հանրապետության ոստիկանության անձնագրային և վիզաների վարչության պետ Մնացական Բիչախչյանից փորձեցինք պարզել, թե մահմեդական երկրի ներկայացուցիչների երկքաղաքացիություն ստանալը   ի՞նչ   գործընթաց է իրենից ենթադրում, եւ թե  ի՞նչ իրավունքներ ու պարտականություններ ունեն վերջիներս ՀՀ քաղաքացիություն ստանալուց հետո, ինչին ի պատասխան Մնացական Բիչախչյանը պատասխանեց. 

-Հայաստանի Հանրապետության երկքաղաքացին՝ ունի Հայաստանի Հանրապետության քաղաքացու համար նախատեսված բոլոր իրավունքները, և կրում է Հայաստանի Հանրապետության քաղաքացու համար նախատեսված բոլոր պարտականություններն ու պատասխանատվությունը:

- Իսկ ինչպես են իրանցիները, պարսիկները , ՀՀ-ում երկքաղաքաղացիության անձնագիր ստանում, ի՞նչ ընթացակարգերով են անցնում:

-Տեսեք, եթե անձը ազգությամբ հայ չի. ՀՀ քաղաքացիություն ստանալու համար պետք է վերջին երեք տարին օրինական բնակվի ՀՀ-ում,  նոր դիմի քաղաքացիություն ստանալու համար:

- Եթե օրինակ, երեք տարի բնակվում է ՀՀ-ում, բայց հասցրել է դատապարտվել կամ ոչ պատշաճ վարքագիծ դրսեւորել` դա նրան չի՞ խանգարի ՀՀ քաղաքացիություն ստանալ:

-Ես չգիտեմ, դա նախագահն է որոշում վերջնական: Քաղաքացիություն ստանալու համար ազգությամբ հայերի վրա չի տարածվում վերջին երեք տարին պարտադիր բնակվելու պայմանը: Բայց եթե ազգությամբ հայ չի, պետք է երեք տարվա կացության քարտ ունենա, ապա դիմի երկքաղաքացիություն ստանալու համար:

NewsMedia. am
Լուրեր Հայաստանից եւ աշխարհից