«Քրեական գործով` կոնկրետ ձայնագրությունում տեղ գտած փաստերի առնչությամբ, այս պահին կատարվում են անհրաժեշտ գործողություններ».Շիրակի մարզի դատախազ

Քրեական գործով` կոնկրետ ձայնագրությունում տեղ գտած փաստերի առնչությամբ, այս պահին կատարվում են անհրաժեշտ գործողություններ. Շիրակի մարզի դատախազ

Օրեր առաջ,  NewsMedia.am-ը հրապարակել էր ձայնագրություն՝ թե իրականում ինչպիսի բարքեր ու կարգեր են տիրում Շիրակի Պետական Համալսարանում, ուր տարիներ շարունակ բարձրաձայնվող կոռուպցիոն սխեմաների մասին, մեկ անգամ չէ, որ մամուլում բարձրաձայնվել է: Իսկ վերոնշյալ ձայնագրությամբ՝ մեկ անգամ եւս փաստվում է, որ ՇՊՀ -ում թավշյա կառավարիչների ձեռագրաբանությունը նույնն է՝ այն ինչ կար նախկինների օրոք:
ՇՊՀ-ի ռեկտորի ժ/պ Երվանդ Սերոբյանը, շարունակում է գրեթե նույն ոճով ղեկավարել բուհը՝ ինչպես որ ժամանակին ղեկավարում էր հանրահռչակ ՀՀԿ-ական՝ Սահակ Մինասյանը:
Մենք անդրադարձել էինք նաեւ, որ մեկ այլ փաստով հարուցված քրեական գործի շրջանակներում, որով անցնում է ռեկտորի ժ/պ-ն արդեն տեւական ժամանակ է, ո՛չ մեղադրանք են առաջադրում, եւ ո՛չ էլ որեւէ կարգավիճակ են տալիս վերջինիս : Ինչը թույլ է տալիս ենթադրելու, որ Սերոբյանի թիկունքում թերեւս կանգնած են գործող իշխանությունները՝ ԿԳՄՍ նախարարի ղեկավարությամբ: Եվ հենց սա է պատճառը, որ Գյումրիում տարատեսակ լուրեր են շրջանառվում, որ Սերոբյանին այդպես էլ մեղադրանք չի առաջադրվի, եւ նա «ջրից չոր դուրս կգա» քանի որ ըստ նույն լուրերի Սերոբյանը Շիրակի մարզպետի, եւ ԿԳՄՍ նախարարի մտերիմի համբավ ունի:

Ի վերջո, թե ինչո՞ւ ՇՊՀ-ի ռեկտորի ժ/պ Երվանդ Սերոբյանին քրերական գործով որեւէ կարգավիճակ չի տրվում, հատկապես հայտնի ձայնագրությունների երեւան ի հայտ գալուց հետո, երբ առերեւույթ ակնհայտ է անգործության եւ պաշտոնական դիրքիր չարաշահման տարրեր, հարցերի պատասխանը, NewsMedia.am-ը փորձեցինք ստանալ Շիրակի մարզի դատախազ ԿԱՐԵՆ ԳԱԲՐԻԵԼՅԱՆԻՑ, ով նախ անդրադարձավ քրեական գործին, նկատելով.
-Հարուցված է քրեական գործ, քրեական գործով ներկայումս կատարվում է ակտիվ քննություն, այս պահին համապատասխան հարցումներ են ուղարկվել ԿԳՄՍ:
ԿԳՄՍ-ից հարցման պատասխանը ստանալուց հետո, անհրաժեշտ իրավական գնահատական կտրվի՝ կոնկրետ անձի արարքին:

-Անկեղծ ասած, գյումրեցիների շրջանում տարածված լուրերի համաձայն, Երվանդ Սերոբյանը ունենալով իշխանությունների աջակցությունը, չեն բացառում, որ ծանոթ-բարեկամ «խաղացնելով»՝ առհասարակ որեւէ կարգավիճակ չի ստանա…Ի՞նչ կասեք այս առնչությամբ, պարոն Գաբրիելյան:

-Գյումրեցիներին վստահեցնում եմ. Շիրակի մարզի դատախազության հետ առնչվող որեւիցէ քրեական գործով` ծանոթ-բարեկամ հարաբերությունները, անգամ չնչին ձեւով չեն կարող ազդել քր. գործերի վրա:
Շիրակի մարզի դատախազին՝ որեւէ մեկը չի կարող ծանոթ-բարեկամի համար խնդրել, դա ես վստահեցնում եմ. ի պաշտոնե:

-Պարոն Գաբրիելյան, իսկ նոր երեւան եկած ձայնագրություններին, որտեղ այսպես ասած բացահայտվում են ռեկտորի ժ/պ-ի գործողությունները, ծանոթ ե՞ք:

-Այո, իհարկե: Այդ ձայնագրությունները նույնպես՝ կցվել են քրեական գործին: Քրեական գործով` կոնկրետ ձայնագրությունում տեղ գտած փաստերի առնչությամբ, այս պահին կատարվում են անհրաժեշտ գործողություններ:

ՆՈՆԱ  ԱԴԱՄՅԱՆ 

NewsMedia.am

Լուրեր  Հայաստանից եւ աշխարհից