ՍԴ նախագահի բնակարանի խուզարկությունը քաղաքական հետապնդման շարունակություն է, և դատարանի որոշմանը ժամանակի ընթացքում տրվելու է քրեաիրավական գնահատական. Ռուբեն Մելիքյան

ՍԴ նախագահ Հրայր Թովմասյանի բնակարանի խուզարկությունը քաղաքական հետապնդման շարունակություն է: Վստահ եմ՝ դատարանի որոշմանը ժամանակի ընթացքում տրվելու է քրեաիրավական գնահատական: Այս մասին լրագրողների հետ զրույցում ասաց «Իրավական ուղի» ՀԿ համահիմնադիր Ռուբեն Մելիքյանը:

«Խուզարկությունը համարում եմ անընդունելի և ապօրինի: Ես՝ որպես իրավաբան, իրավապաշտպան՝ նշեմ, որ այն դեպքերում, երբ կա հարուցված քրեական գործ, բոլոր քննչական գործողությունները, բոլոր սահմանափակումները՝ տվյալ դեպքում՝ բնակարանի անձեռնմխելիության, պետք է նույնպես իրավաչափ լինեն: Ինչպե՞ս եք պատկերացնում՝ քրեական գործ հարուցելու փաստը թույլտվությու՞ն է՝ կատարելու ցանկացած միջամտություն, ցանկացած ապօրինություն»,-նշեց Մելիքյանը:

Վերջինիս համոզմամբ՝ երեք պատճառներով խոսք չէր կարող լինել խուզարկության մասին.

«Առաջին՝ քրեադատավարական տեսանկյունից՝ եթե խոսքը վերաբերեր այնպիսի ենթադրյալ հանցագործությանը, որտեղ ողջամտորեն կարելի էր ենթադրել, որ բնակարանում կարող էր ինչ-որ բան տեղի ունենալ, կարող էր քննարկվել խուզարկության հարցը: Այստեղ մենք գործ ունենք այնպիսի ենթադրյալ հանցագործության հետ, որի պարագայում առհասարակ բնակարանում հանցանիշներ հայտնաբերելը անտրամաբանական է»,-ասաց Մելիքյանը:

Երկրորդ հանգամանքն, ըստ իրավապաշտպանի, այն է, որ Թովմասյանին մեղադրանք առաջադրելուց շուրջ մեկ ամիս է անցել. «Քննչական տակտիկայի տեսանկյունից կարելի է հարց բարձրացնել՝ տրամաբանակա՞ն է մտածել, որբ բնակարանում կարող էր ինչ-որ բան հայտնաբերվել»,-նշեց նա՝ հավելելով, որ երրորդն էլ սահմանադրաիրավական կողմն է.

«Մենք գործ ունենք ՍԴ գործող նախագահի հետ, և դատարանը թույլ է տվել այս գործողությունը կատարել՝ հնարավոր է այնպիսի պայմաններում, երբ մեկ այլ դատարան մերժել է»,-պարզաբանեց իրավաբանը:

Նրա խոսքով՝ այս խուզարկությունը կապ չուներ ո՛չ իրավունքի, ո՛չ քերական դատավարության, ո՛չ սահմանադրական իրավունքի, ո՛չ քննչական տակտիկայի հետ: «Նման գործողությունները վախեցնելու, ռեպրեսիաների տպավորություն ստեղծելու շարժառիթով են պայմանավորված»,-ասաց նա:

Հիշեցնենք՝ այսօր առավոտից ՀՔԾ աշխատակիցները կողմից խուզարկվում էր Թովմասյանի բնակարանը: