Իրանի հայ պատգամավորը բացառիկ մանրամասներ է ներկայացնում. Մեջլիսի 290 պատգամավորներից վեցի մոտ՝ Կորոնավիրուսի թեստը դրական է եղել

Իրանի հայ պատգամավորը բացառիկ մանրամասներ է ներկայացնում. Մեջլիսի 290 պատգամավորներից վեցի մոտ Կորոնավիրուսի թեստը դրական է եղել

Ամբողջ աշխարհում կորոնավիրուսով վարակվածների թիվը գերազանցել է 200 հազարը, իսկ մահվան դեպքերինը՝ 8 հազարը: Ու չնայած նրան, որ Չինաստանում համաճարակն անկում է ապրում, վարակվածների թվի ամենամեծ աճը նկատվում է Իտալիայում, Իսպանիայում, Գերմանիայում, Իրանում և ԱՄՆ-ում:

Իսկ թե ինչպե՞ս են դիմագրավում Իրանում մեր հայրենակիցները նոր տեսակի կորոնավիրուսի դեմ, առհասարակ ի՞նչ վնասներ է հասցրել կորոնավիրուսի տարածումը Իրանի տնտեսությանը, այս եւ այլ հարցերի շուրջ NEWSMEDIA.am-ի հետ զրույցում բացառիկ մանրամասներ ներկայացրեց Իրանի Մեջլիսի հայազգիպատգամավոր Կարեն Խանլարյանը, ով նախ անդրադարձավ Կորոնավիրուսի տարածմանը հայ համայնքում.

-Բարեբախտաբար, հայ համայնքում Կորոնավիրուսով վարակված շատ մարդիկ չկան: Կան երկու-երեք հոգի, ովքեր հոսպիտալացվել են Կորոնավիրուսի կասկածանքով: Ցավոք ունենք նաեւ հայազգի երեք տարեց կնոջ մահ, որոնց մոտ կասկածվել է կորոնավիրուս, ( թեեւ մինչեւ վերջ էլ պարզ չդարձավ, թե որն է եղել նրանց մահվան բուն պատճառը):

Ամեն դեպքում հայ համայնքում իրավիճակը խաղաղ է. չկա բացարձակ խուճապ, մեր հայրենակիցները, ինչպես ընդունված է ասել մեզ մոտ՝ լավ տրամադրությամբ ենք դիմավորում եւ ճանապարհում Կորոնավիրուսին: Պարզապես առօրյան է այստեղ խաթարվել. փակ են խանութները, դպրոցները:Մարդիկ աշխատանքից են ընկել, անորոշ իրավիճակը միայն սրանով է պայմանավորված: Թե չէ հայ համայնքը՝ շատ լավատես է: Ասում են՝ մոտ մեկ ամիս հետո , Կորոնավիրուսը կնահանջի: Հուսանք՝ այդպես էլ կլինի. լավատես ենք ամեն դեպքում:

-Մեջլիսում ինչպես են ընթանում աշխատանքները, եւ ինչպես են պատգամավորները պայքարում Կորոնավիրուսի դեմ:

-Այսպես ասեմ՝ Մեջլիսի 290 պատգամավորներից վեցի մոտ Կորոնավիրուսի թեստը դրական է եղել: Մեջլիսի աշխատանքները փորձում ենք իրականացնել վիրտուալ. մինչեւ որ վիրուսը նահանջի:Պայքարում ենք:

-Պարոն Խանլարյան, Կորոնավիրուսը բացի առողջապահական ոլորտից՝ բնականաբար վնասներ է հասցրել նաեւ Իրանի տնտեսությանը: Հետեւաբար, ինչպե՞ս կբնորոշեիք տնտեսության ներկայիս վիճակը՝ հաշվի առնելով նաեւ ԱՄՆ պատժամիջոցները:

-Շատ ճիշտ հարց տվեցիք.այո, տնտեսությունը այս օրերին տուժում է կրկնակի: Բայց այն խուճապը, որը նկատելի է Եվրոպայում եւ ԱՄՆ-ում՝ Իրանում չկա: Մարդիկ կարողանում են իրենց առօրյա գնումները անել: Բայց ինչ խոսք՝ կա գնաճ, իսկ ամերիկյան դոլարը՝ տեսնում ենք ժամ առ ժամ արժեւորվում է: Եւ դա բնականաբար իր ազդեցությունն է թողնում տնտեսության վրա: Թեեւ այդ ազդեցությունների իրական պատկերի մասին, դեռ վաղ է խոսելը: 

-Պարոն Խանլարյան, Կորոնավիրուսի հետ կապված տարբեր վարկածներ են շրջանառվում. շատ գիտնականներ արդեն իսկ չեն բացառում, որ այդ վիրուսը արհեստածին է, եւ ստեղծվել է լաբարատորիայում:

-Այո, մեզ մոտ էլ են տարբեր վարկածներ շրջանառվում: Ասում են՝ որ սա չինական բիոլոգիական զենք է, մի մասն էլ ասում են՝ ամերիկյան է: Ամեն դեպքում Իրանը այն երկրներից է, որ Կորոնավիրուսից շատ բարձր մակարդակով է տուժել: Հիմա չգիտեմ. եթե անգամ սա բիոլոգիական զենք է՝ նպատակը այս զենքի օգտագործման խիստ անորոշ է դեռ:

ՆՈՆԱ ԱԴԱՄՅԱՆ 

NewsMedia.am 

Լուրեր  Հայաստանից եւ աշխարհից