150 մլն դրամ. կորոնավիրուսով պայմանավորված՝ քաղաքացիներին որ հյուրանոցներում է մեկուսացրել կառավարությունն ու որքան գումար է վճարել դրանցից յուրաքանչյուրին

Հայտնի է, որ նոր կորոնավիրուսի տարածմամբ պայմանավորված՝ մարտ ամսվա սկզբից ՀՀ կառավարությունը վարակված անձանց հետ շփված կամ վտանգավոր գոտիներից վերադարձող քաղաքացիներին մեկուսացնելու համար վարձում է մասնավոր տարածքներ:

Մեկուսացածների առաջին խումը Ծաղկաձորի «Գոլդեն Փելեսում» էր, սակայն հյուրանոցային ծառայությունների համար պետությունը չի վճարել, որովհետև հյուրանոցային համալիրը դեռ սեփականատեր չունի:

Ինչ վերաբերում է մյուս հյուրանոցներին ու դրանց մատուցած ծառայությունների դիմաց վճարումներին, ապա Tert.am-ը Գնումների պայմանագրերի հաշվետվողականության կայքից տեղեկացավ, թե ինչ հյուրանոցային ծառայությունների համար ինչ ծախս է արվել:

Մասնավորապես, կառավարությունը նշված ժամանակահատվածի համար միայն հյուրանոցային ծառայությունների համար ծախսել է 150 մլն 68 000 դրամ։

Կառավարությունն ամենաթանկը վճարել է «Իմպերիալ հոթել»-ին՝ 15 օրվա համար՝ առանց սննդի, 19 մլն 635 հզր դրամ: Թե քանի համար է հատկացրել հյուրանոցը այս գումարի դիմաց, հրապարկված փաստաթղթում նշված չէ:

«Ինվետս հոթել»-ում կառավարությանը քաղաքացիների մեկուսացման համար 15 գիշերվա դիմաց՝ ներառյալ սնունդը, վճարել է գրեթե 21 մլն դրամ՝ 20 մլն 902 հզր դրամ։
Կառավարությունը վերցրել է 55 համար՝ 1500 քաղաքացի տեղավորելու համար:

Մեկ հյուրանոց Կառավարությունը վերցրել է Գյումրիում՝ «Գյումրի» հյուրանոցը՝ 10 օրով՝ ապրիլի 5-ից 15-ը: Դրա դիմաց վճարել է 15 մլն 900 դրամ:

«Նորք Ռեզինդես» հյուրանոցում համարներ են վարձակալված մինչև ապրիլի 30-ը՝ առանց սննդի: Սենյակների քանակը չի նշվում, վճարը կազմում է 36.5 մլն դրամ:

Ծաղկաձորի «Գարուն Հյուրանոց»-ում ևս կտեղավորվեն մեկուսածաներ՝ ապրիլի 1-ից 15-ը՝ ծառայության մեջ սնունդը ներառված չէ, իսկ պետությունը կվճարի 10,5 մլն դրամ:

«Նաիրի» հյուրանոցի ծառայությունների դիմաց վճարվել է 13 մլն 920 հզր դրամ:

Կոտայքի մարզում գործող «Ռիչմայնդ» հյուրանոցում կառավարությունը նախատեսել է տեղավորել 85 մարդ՝ ապրիլի 1-ից 15-ը՝ վճարելով 12 մլն 337 հզր դրամ: Այնտեղ նախատեսվել է մեկուսացնել 85 անձի:

«Սոչի Պալասը» ևս կտեղավորի քաղաքացիների՝ ապրիլի 3-ից 15-ը: Կառավարությունը վճարել է 6 մլն 669 դրամ, թե քանի սենյակ է վարձակալած, հրապարկված չէ:

«Արարատ հոթել»-ում վարձակալվել է 50 սենյակ՝ 2 օրվա համար, տեղավորվել է 120 անձ, վճարվել՝ 3.5 մլն դրամ:

Նորքում գտնվող «Ռեժինե» հյուրանոցին կառավարությունը վճարել է 4 մլն 50 հզր դրամ: Այդ գումարի դիմաց տրամադրվել է 45 համար՝ 4 գիշեր անցկացնելու համար՝ ներառյալ սնունդը, ինչպես նաև 30 համար՝ երեք գիշերվա համար, առանց սննդի։

«Ռումի ՍՊԸ»-ին մարտի 27-ից 31-ի համար Կառավարությունը վճարել է 6 մլն 77 հզր դրամ:
«ՎՖՋ ՍՊԸ»-ին պատկանող հյուրանոցից ևս Կառավարությունն օգտվել է, վճարել է 3 մլն 78 հզր դրամ: