Փաշինյանի աներորդու այս հայցը, ես այլ կերպ չեմ կարող մեկնաբանել. քան Փաշինյանների ընտանիքի կողմից իմ դեմ կազմակերպված ճնշում

ՀՀ Ազգային ժողովի «Իմ քայլը» խմբակցության պատգամավոր Հրաչյա Հակոբյանը դատական հայց է ներկայարցել «Ադեկվադ» միաբանության անդամ Արթուր Դանիելյանի, «Քաղաքացիական գիտակցություն» ՀԿ-ի ղեկավար Նարեկ Սամսոնյանի, քաղաքագետ Գագիկ Համբարյանի, «Առողջ հանրություն» ՀԿ-ի նախագահ Մարինա Խաչատրյանի դեմ։

Ըստ Դատական տեղեկատվական համակարգի, պատգամավորը դատական հայց է ներկայացրել պատիվը, արժանապատվությունը և գործարար համբավը արատավորող վիրավորական և զրպարտող արտահայտությունների համար՝ հրապարակային ներողություն, ու հերքում խնդրելու պարտավորեցնելու պահանջներով։
Գործը մակագրվել է Երևանի ընդհանուր իրավասության դատարան դատավոր՝ Դանիել Մխեյանին:

Ի՞նչն է ընկած հայցի հիմքում, եւ որքանո՞վ այն հիմնավոր, այս եւ այլ հարցերի շուրջ NewsMedia.am-ը զրուցեց հայտնի քաղաքագետ ԳԱԳԻԿ ՀԱՄԲԱՐՅԱՆԻ հետ, ով նախ նկատեց.

-Սա ազատ խոսքի, ազատ մտքի արտայայտության դեմ ներկայացված հայց է: Ինչո՞ւ. որովհետեւ ես շատ վաղուց եմ այս իշխանությունների համար դարձել մեծ խնդիր, որովհետեւ հիմնականում քննադատում եմ իրենց գործունեությունը: Փաշինյանի աներորդու այս հայցն էլ՝ այլ կերպ չեմ կարող մեկնաբանել. այն իմ դեմ կազմակերպված ճնշում է՝Փաշինյանների ընտանիքի կողմից: Որովհետեւ հայցը, որով Հրաչյա Հակոբյանը մտել է դատարան, ուղղակի զավեշտալի է: Պարոն Հակոբյանը շատ վիրավորվել է այն հանգամանքից, որ ես մայիսի 2-ին իմ էջում վերլուծություն եմ կատարել կապված մաքսանենգ ճանապարհով արտահանված ծխախոտի հայտնի պատմության հետ կապված, որի մեջ ըստ բազմաթիվ լրատվամիջոցների տարածած տեղեկատվության, ներքաշված է նաեւ ինքը: Խնդիրը հետեւյալն է, որ ես իմ վերլուծության մեջ գրել եմ, որ տվյալ տեղեկատվությունը լրատվամիջոցներն են հրապարակել, ավելին իմ վերլուծության մեջ անդրադարձել եմ, որ Հրաչյա Հակոբյանը հերքել է, այսինքն նրա կարծիքն էլ եմ ներկայացրել:

Սակայն շատ զարմանալիորեն, Հակոբյանը իմ դեմ հայց է ներկայացրել՝ պահանջելով որպեսզի ես հերքեմ այդ գրառման մեջ իր անունը: Այն դեպքում, որ ես ինքս Հրաչյա Հակոբյանին չեմ մեղադրել. Հակոբյանի անունը տվել է կոնկրետ լրատվամիջոց, որի նյութը երկու տասնյակից ավել լրատվամիջոցներ են տարածել, հազարավոր օգտատերեր էլ տարբեր սոցցանցերով եւս՝ արտատպել եւ տարածել են հարյուր հազարավոր մեկնաբանություններով: Բայց արի ու տես, որ Հակոբյանի համար ամենամեծ խնդիրը ես եմ:
Այստեղից հետեւություն, որ սա բացահայտ ճնշում է ինձ վրա. այսպիսով իշխանությունները ինձ փորձում են լռեցնել ՝ այլ տարբերակներ չգտնելով: Նիկոլ Փաշինյանի իշխանության գալուց հետո, սա առաջին դեպքը չէ. այս իշխանության օրոք սկսվեց իմ գլխին գործ հարուցելու գործընթացը՝ ՇՊՀ-ի հետ կապված, որը նրանց մոտ բացարաձակ չստացվեց եւ շատ արագ տապալվեց: Հետո, փորձ կատարվեց ՇՊՀ նախկին ռեկտորի միջոցով իմ բերանը փակել:

Ի դեպ, ինչո՞ւ եմ ես ենթադրում եւ համարում, որ այդ հայցերի հետեւում կանգնած է Փաշինյանի իշխանությունը, ապա ըստ իս պատճառը մեկն է: Սահակ Մինասյանը, ով նախկինում զբաղեցրել է Շիրակի մարզի ՀՀԿ մարզային կառույցի ղեկավարի պաշտոնը, հեղափոխությունից հետո դարձել է այս իշխանությունների մտերիմը՝ մարզում: Ես ինքս եմ տեսել, թե ինչպես է վերջինս ԱՅՈ-ի քարոզարշավի ժամանակ՝ մտնում Գյումրիում գտնվող ԱՅՈ-ի շտաբ:

Եզրափակելով խոսքս կրկնում եմ. այս ամենը ես համարում եմ քաղաքական հետապնդում, որը նպատակ ունի սահմանափակելու իմ մտքի ազատ արտահայտությունը:

ՆՈՆԱ ԱԴԱՄՅԱՆ 

NewsMedia.am 

Լուրեր   Հայաստանից եւ աշխարհից