«Ոստիկանապետը իրեն շրջապատել է խնամի-ծանոթ-բարեկամներով. համակուրսեցիները վարչության պետեր են, հարցերը կրկին լուծվում են ընկերական շրջապատով».Փաստաբանը ահազանգում է

«Ցանկացած Ոստիկանության արդյունավետ աշխատանքի գրավականը` ոստիկանապետի դիրքն ու ունեցած հեղինակությունն է ոլորտում: Իսկ քանի որ ներկայիս ոստիկանապետը եւ նրա մարզային վարչության պետերը սերված են նախկին իշխանություններից, ապա կոնկրետ ես` ոստիկանի բարի համբավը կասկածի տակ եմ դնում: Քանի որ, նրանց վարքագիծը դեռեւս անհասկանալի է: Անհասկանալի է. թե ով՝ ում է պաշտպանում: Անհասկանալի է. ոստիկանը քաղաքացի եւ հասարակական կարգ է պաշտպանո՞ւմ, օրենքի եւ արդարադատության շահն է՞ ներկայացնում, թե՞ հասարակությունից ինքն է փախնում »,-այս մասին անդրադառնալով իրավապահ համակարգում առկա խնդիրներին եւ դրանց պատճառներին, NEWSMEDIA.am-ի հետ զրույցում ասաց մի շարք աղմկահարույց քրեական գործերով հայտնի փաստաբան ԼՈՒՍԻՆԵ ԶԵՅՆԱԼՅԱՆԸ, ընդգծելով.

-Ոստիկանության լիազորությունների մեջ է մտնում հասարակական կարգի ապահովումն ու պահպանումը. բայց արդյունքում մենք տեսնում ենք, որ ոստիկանին՝ մեղմ ասած, ուշադրություն չեն դարձնում: Այսօր փողոցում ման եմ գալիս եւ ականատես լինում, թե ինչպես են մարդիկ առանց դիմակների շրջում: Ստացվում է, որ այսօր անգամ կառավարությանը լուրջ չեն ընդունում, ուր մնաց ոստիկանապետին: Իսկ ոստիկանապետը առհասարակ այսօր իրեն շրջապատել է խնամի-ծանոթ-բարեկամներով. համակուրսեցիները վարչության պետեր են, հարցերը կրկին լուծվում են ընկերական շրջապատով:

Հիմա Գարիկ Մուրադյանը ոստիկա՞ն է, թե՞ գողական

Անդրադառնալով Սիսիանի աղմկահարույց միջադեպին եւ տարեց պապիկին ոստիկանական բաժանունքում խոշտանգման ենթարկելու փաստին, տիկին Զեյնալյանը նկատեց.

-Գեւորգ Ազիզյանը, ինչպես նաեւ Արագածոտնի ոստիկանապետը՝ տարածված տեղեկությունների համաձայն, ոստիկանապետ Արման Սարգսյանի համակուրսեցիներն են, որոնց համակարգ է բերել նախկին գլխավոր դատախազ Գեւորգ Կոստնանյանը: Հիմա էլ, Արման Սարգսյանը դառնալով ոստիկանապետ՝ շարունակում է ՀՀԿ-ի որդեգրած քաղաքականությունը:

Ամպագոռգոռ հայտարարում են ոչ մի քրեական ենթամշակույթ, ոչ մի կոռուպցիա… Բա թող մի հատ գնան՝ Սիսիանի միլպետի կենսագրական տվյալները ուսումնասիրեն:

Թող մի հատ ուսումնասիրեն եւ տեսնեն Գարիկ Մուրադյանը՝ Մարտունիի միլպետի օպեր գծով տեղակալ եղած ժամանակ՝ անձնական ամբիցիաների համար, ինչպես է Երեւանի քրեական ենթամշակույթ կրող անձանց «հանում» Մարտունու քրեական ենթամշակու կրողների դեմ` «բազար» անելու: Հիմա Գարիկ Մուրադյանը ոստիկա՞ն է, թե՞ գողական:

Նույն Մուրադյանը, մայիսյան հեղափոխության ժամանակ, քաղաքապետի ցուցումով մարդկանց քաշքշուկի է ենթարկել: Եվ միայն Մելքոնյանի՝ Մարտունու միլպետ դառնալուց հետո է նա ուղարկվել կադրերի ռեզերվ, որովհետեւ իր անվան հետ կապված չափազանց շատ բողոքներ են եղել: Պատկերացրեք, որ մարդը եղել է օպեր գծով Մարտունիի միլպետի տեղակալ, բայց ինքը ձեռքի հետ էլ գիշերային ակումբ է աշխատացրել:

Ու էդքանից հետո, Արման Սարգսյանը դեռեւս փոխոստիկանապետ եղած ժամանակ, Օսիպյանի միջնորդում է՝ որպեսզի Գարիկ Մուրադյանը դառնա Սիսիանի օպեր գծով տեղակալ:Որպեսզի հետագայում դառնա նաեւ ոստիկանապետ: Դե պատկերացրեք, թե ինչ ոստիկանապետ ունենք:

Հ.Գ. Տիկին Զեյնալյանի խոսքով Սիսիանից առավել խայտառակ իրավիճակ է տիրում նաեւ Արագածոտնի մարզային ոստիկանությունում, որին անդրադառնալու առիթներ դեռ կունենանք:

ՆՈՆԱ  ԱԴԱՄՅԱՆ 

NewsMedia.am 

Լուրեր  Հայաստանից եւ աշխարհից