«Ես համոզվել եմ, որ ե՛ւ ՊՆ նախարարը, ե՛ւ Գլխավոր շտաբի պետը, ե՛ւ բանակային կորպուսի հրամանատարը, սառնասրտորեն ղեկավարում են.գիտեն իրենց պարտականությունները»

Որքանով է այսօր քաղաքական եւ ռազմական էլիտան պատրաստ ցանկացած պահի հակառակորդի սադրանքներին արժանի հակահարված տալու, եւ զսպելու ադրբեջանական զինուժի սադրիչ գործողությունները, NEWSMEDIA.am-ը հարցադրում արեց պաշտպանության նախկին նախարար, պատերազմի բովով անցած, բանակաշինության գործում իր ուրույն տեղը զբաղեցրած գեներալ-գնդապետ ՍԵՅՐԱՆ ՕՀԱՆՅԱՆԻՆ: Մեր հարցին, ի պատասխան պաշտպանության նախկին նախարարը նկատեց.

-Նման գնահատական՝ անկեղծ ասած ես չեմ կարող տալ, որովհետեւ ես այսօրվա քաղաքական իշխանությունների հետ որեւէ առնչություն չունեմ. բացի այն, որ երբեմն կարող է ինչ-որ տեղ հանդիպենք, եւ բարեւենք իրար:
Չնայած նրան, որ ես մշտապես հայտնել եմ իմ պատրասատակամությունը՝ որ պատրաստ եմ ցանկացած պահի ազգային անվտանգության հարցերում՝ իմ գործուն մասնակցությունը ունենալ: Այս համատեքստում՝ ես ուզում եմ երկու հանգամանքի վրա Ձեր ուշադրությունը հրավիրել: Առաջինը՝ շատ կարեւոր է արձանագրել, որ տարիների ընթացքում ՀՀ Զինված ուժերը եւ Արցախի Պաշտպանության բանակը ապացուցել են, որ իրենք անընդհատ կատարելագործվող, զարգացող կառույցներ են, եւ պատրաստ են իրենց առջեւ դրված խնդիրներն իրականացնել լավագույնս:

Ի վերջո այս տարիների ընթացքում, իրենք այդ քննությունը տարբեր դժվարին իրավիճակներում՝ տարբեր սադրանքների ժամանակ, կարելի է ասել գերազանց կերպով են հանձնել: Այսօրվա Զինված ուժերը՝ տարածաշրջանում միանշանակ մրցունակ են, եւ մարտունակ: Մեր երկիրը ապացուցել է, որ բանակը հասարակության հետ միասին, պատրաստ է շատ արագ համախմբվել՝ երկրի պաշտպանությունը իրականացնելու համար:

Երկրորդ՝ տարիների ընթացքում պետական կառավարման համակարգում մի այսպիսի իրականություն է ձեևավորվել, մի այնպիսի համակարգ գոյություն ունի, որ մեր երկիր ղեկավարությունը կարող է շատ կարճ ժամանակահատվածում՝ խաղաղ իրավիճակից տեղափոխվելու պատերազմական իրավիաճակի: Եւ Զինված ուժերի պլանների կիրառման համաձայն՝ իրականացնել ե՛ւ կառավարումը, ե՛ւ բոլոր կառույցների անմիջական գործողությունները՝ պաշտպանական քաղաքականության մեջ: Այստեղ քաղաքական ղեկավարների դերը՝ իհարկե նշանակալից է: Բայց քանի որ քաղաքական ղեկավարները տեսնում են այդ պատրաստվածությունը՝ իրենց համար հեշտ է արագ մտնել իրադրության մեջ, եւ ԶՈՒ ղեկավարության հետ միասին իրենց պարտականությունները կատարել մաքսիմալ:

-Պարոն Օհանյան, հետաքրքիր է՝ վերջին լարված օրերի ընթացքում, որպես ՊՆ նախկին նախարար, որպես ռազմական մեծ փորձ ունեցող գեներալ, զրուցել ե՞ք ՊՆ նախարար Դավիթ Տոնոյանի հետ. Ձեր ռազմական փորձը, գիտելիքները փոխանցելու, իսկ անհրաժեշտության դեպքում նաեւ՝ հայոց բանակին սատար կանգնելու համար:

-Անկասկած խոսել եմ ե՛ւ Պաշտպանության նախարարի, ե՛ւ Շտաբի պետի, ինչպես նաեւ այն բանակային կորպուսի հրամանատարի հետ, որտեղ որ այդ մարտական գործողությունները իրականացվել են: Խոսել եմ ընդամենը մեկ անգամ, որովհետեւ նման իրադրության մեջ՝ չպետք է խանգարել: Ես նկատել եմ, համոզվել եմ, որ ե՛ւ ՊՆ նախարարը, ե՛ւ Գլխավոր շտաբի պետը, ե՛ւ բանակային կորպուսի հրամանատար գեներալ Գրիգորի Խաչատուրովը, սառնասրտորեն ղեկավարում են, գիտեն իրենց պարտականությունները:

Հիշեցնենք, որ 2020 թվականի հուլիսի 12–ին, ժամը 12:30-ի սահմաններում Ադրբեջանի զինված ուժերի զինծառայողները «ՈւԱԶ» մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրք: Ժամը 13:45-ին ադրբեջանական կողմը կրկնել է հայկական զինված ուժերի սահմանային դիրքը գրավելու փորձը` կիրառելով հրետանային կրակ, սակայն ճնշվել է հայկական կողմից և հետ շպրտվել`կորուստներ տալով: