Տղե՛րք, հիշե՛ք, որ մեր կռիվը թշնամու հետ սահմանին է, ոչ թե փողոցներում, վեր կանգնեք թշնամու սադրաքներից. Պարգև արքեպիսկոպոս Մարտիրոսյանի պատգամը աշխարհասփյուռ հայությանը

Գաղտնիք չէ, որ այս օրերին թշնամին սադրանքներ է իրականացնում ոչ միայն սահմանին, այլ նաեւ սահմանից դուրս: Ադրբեջանցիների թշնամանքը մեծացրել է իր աշխարհագրությունը, եւ գաղտնիք չէ, որ  տարբեր երկրներում հաստատված  մեր հայրենակիցների կյանքերը  վտանգված են... Իսկ պատճառը մեկն է` թշնամին չի կարողանում մարսել, որ հայ զինվորը, հայ սպան մեկ անգամ եւս ապացուցել է, որ ոչ մի զինտեխնիկա, ոչ մի գերճշգրիտ անօդաչու սարք չի կարող հաղթել հայ զինվորկի բազկի ուժին:

Հայ ազգը ունի երկու գերխնդիր` ազգի միասնականություն եւ հայրենիքի անվտանգություն

Հայ զինվորի մարտական ոգու, սահմանային լարումների ու այս օրերին հայության դեմ իրականացվող  սադրանքների մասին,  NEWSMEDIA.am-ը զրուցել է  Արցախի թեմի առաջնորդ Տ. Պարգև արքեպիսկոպոս Մարտիրոսյանի հետ, ով նախ նկատեց.

-Ֆենոմենալ ազգ է հայ ազգը, ինչքան էլ պառակտված լինենք`վտանգի առաջ բոլորս ենք համախբվում, եւ հենց այդ համախմբումն է, որ թշնամուն ծնկի է բերում: Հիմա հարց կառաջանա. ինչո՞ւ խաղաղ ժամանակ նույն համախմբվածությունը չենք ցուցաբերում, իսկ պատասխանը մեկն է. մարդկային զգացմունքները ծայրահեղ ձեւով եմ դրսեւորվում: Խաղաղ պայմաններում մարդը հեշտությամբ մոռացության է տալիս վտանգները, խաղաղ պայմաններում ցավոք սրտի  դժվար է կամքը լարել,  եւ համախբվել: Բայց հայ ազգը պետք է այնպես դաստիարակել, որպեսզի բոլորս ծառայենք հանուն  հայրենիքի եւ հանուն  մեր ազգի անվտանգությանը: Հայ ազգը ունի երկու գերխնդիր` ազգի միասնականություն,  եւ հայրենիքի անվտանգություն: Այս սա է պետք  սերմանել մեր մատաղ սերնդին ամեն օր, ամեն վարկյան:

- Սրբազա՛ն,  ինչպե՞ս կբնութագրեիք հայ զինվորին երեկ եւ այսօր:

- Լավ հարց էր. այսօր, երբ հաճախ մեկնում եմ առաջին գիծ ու տեսնում հայ զինվորի հայացքը, խրոխտ ձայնը, նրանց մտածողությունն ու գիտակցությունը, անկեղծ ասած`ապշում եմ. իմ սպասածից ավելին են մեր զինվորները: Փայլուն սերունդ ունենք, ինչը բնական է, քանի որ ամեն սերունդ պետք է գերազանցի նախորդին, եթե ցանկանում ես  առաջխաղացում ունենալ

-Սրբազան, ի՞նչպես գիտեք, այս օրերին` հայ-ադրբեջանական «մարտեր» են ընթանում նաեւ ՀՀ-ի  սահմաններից դուրս: Որպես հոգեւոր հայր, Ձեր պատգամը աշխարհասփյուռ հայությանը:

-Իմ հայրական հորդորը՝ աշխարհասփյուռ հայությանը հետեւյալն է. տղե՛րք, մի՛ տրվեք թշնամու սադրանքներին, եկեք մեկ անգամ եւս աշխարհին ապացուցենք, որ հայ ազգը կարող է վեր է կանգնել,  եւ շրջանցել ցանկացած սադրանք: Հիշեք մեր կռիվը թշնամու հետ սահմանին է, ոչ թե փողոցներում: Աստված պահպան համայն հայությանը՝ ցանկացած սադրանքներից: 

Պատրաստեց՝ ՆՈՆԱ ԱԴԱՄՅԱՆԸ