«Թուրք-ադրբեջանական ահաբեկչական դաշինքը հենց այնպես չի դադարեցնելու հարձակումը Արցախի ու Հայաստանի նկատմամբ». վարչապետ

«Պատերազմն ընդդեմ Արցախի մենարկեց մեզ համար ոչ անսպասելի կերպով: Մենք գիտեինք ու սպասում էինք, հարցն այն էր, թե կոնկրետ որտե՞ղ ու ո՞ր ժամին թշնամին կհարձակվի: Թուրք-ադրբեջանա-ահաբեկչական վարձկանների դաշինքը ձեռնարկեց ուժգին հարձակում Արցախի վրա՝ տանկեր, զրահամեքենաներ, հրթիռներ, հրետանի, ԱԹՍ-ներ և այլն: Հակառակորդը առաջին շաբաթվա մեջ չունեցավ ոչ մի ռազմավարական ու տարածքային հաջողություն ու սա այն պայմաններում, երբ չուներ մատակարարման ու մարդուժի ոչ մի սահմանափակում: Այս ընթացքում հակառակորդը մեծ թվով զինտեխնիկա կորցրեց, զոհեր տվեց, բայց զոհերի մի մասը վարձկան ահաբեկիչներ էին, ինչը ամենևին ծանր չէին տանում Ադրբեջանում: Մինչդեռ մեր ամեն կաթիլ արյունը մրմուռով է պատում բոլորիս»,- ուղիղ եթերում տեսաուղերձի ժամանակ ասաց ՀՀ վարչապետ Նիկոլ Փաշինյանը: Նա անդրադարձավ նաև մոսկովյան պայմանավորվածություններին: «Ադրբեջանը ոչ մի վայրկյան հավատարիմ չմնաց հրադադարի պայմանավորվածությանը. մինչև այժմ էլ դա ոտնահարում է: Սա նշանակում է, որ Ադրբեջանը շարունակում է հավատարիմ մնալ իր հայտարարած քաղաքական գծին՝ ԼՂ ամբողջական օկուպացիայի խնդիր է դրել իր առաջ... Թուրք-ադրբեջանա-ահաբեկչական նախնական պլանը՝ բլից-կրիգով գրավել ԼՂ-ն ու հարակից տարածքները, ձախողվել է՝ մեր բանակի հերոսական գեներալների, սպաների, կամավորների, զինվորների շնորհիվ: Այս պահին մեր զոհերի թիվը շատ մեծ է ու ես սգում եմ մեր քաջարի նահատակների համար... Պատերազմի 18 օրվա ընթացքում մեր զորքերը հյուսիսային ու հարավային ուղություններով որոշակի նահանջ են ունեցել: Վերջին օրերին հակառակորդը փոխել է իր մարտավարությունը՝ դիվերսիոն խմբերով փորձելով խառնաշփոթ սկսել թիկունքում, այսուհանդերձ ԱՀ ՊԲ-ն վերահսկողության տակ է պահում ընդհանուր վիճակը՝ հակառակորդին պատճառելով մեծաթիվ կորուստներ: Ստեղծվել է բավականին ծանր իրադրություն. այս արձանագրումը, սակայն, չեմ անում հուսահատության կամ անելանելիության բերումով, այլ՝ որովհետև պարտավորություն ունեմ ճշմարտության լեզվով խոսելու ժողովրդի հետ»: Վարչապետն անդրադարձավ նաև այսօրվա ուղերձի հիմնական նպատակին. «Հիմնական նպատակը մեր անելիքի ու ռազմավարության մասին խոսելն է ու դրա շուրջ համախմբումը քաջալերելը: Թուրք-ադրբեջանա-ահաբեկչական դաշինքը հենց այնպես չի դադարեցնելու իր հարձակումը Արցախի ու Հայաստանի նկատմամբ: Այս օրերին ԵԱՀԿ ՄԽ երկրները ջանքեր են գործադրում հրադադարի հաստատմանը հասնելու ուղղությամբ: Ուզում եմ նրանց շնորհակալություն հայտնել այդ ջանքերի համար: Հայ ժողովրդին հնարավոր չէ վախեցնել, մենք կանգնելու ու պայքարելու ենք մինչև վերջ ու վերջի անունն է՝ ազատ ու երջանիկ Արցախ, ազատ ու երջանիկ Հայաստան: Մեզնից յուրաքանչյուրը պետք է կենտրոնանա այս խնդրի վրա: Արցախը, բանակը, զինվորը, առաջնագիծը. ահա, թե ինչը պետք է լինի մեր ջանքերի կիզակետը ՀՀ-ում ու Սփյուռքում: Մենք պիտի հաղթենք ու ապրենք»,- եզրափակեց Նիկոլ Փաշինյանը: