«Ոչ մի վարձկան չի կարող ծնկի բերել հայ զինվորին. ես դա ասում եմ որպես հերոսի մայր, ով պատրաստ է զենք վերցնել , եւ կանգնել մեր տղաների կողքին».ԳԱՅԱՆԵ ԱՆՏՈՆՅԱՆ

Ինչպես են մեր հերոս տղաների մայրերը կարողանում ամոքել իրենց հերոս որդիների կորստի վիշտը, ինչպես են շարունակում ապրել ու պայքարի առաջամարտիկ դառնալ…

NEWSMEDIA.am-ը զրուցել է ապրիլյան քառօրյա պատերազմի հերոս ԱԴԱՄ ՍԱՀԱԿՅԱՆԻ մայրիկի` ԳԱՅԱՆԵ ԱՆՏՈՆՅԱՆԻ հետ:

Հերոս Ադամը՝ ԻՐ  ԱՐՅԱՆ ԳՆՈՎ, ԶԻՆԱԿԻՑՆԵՐԻ ՀԵՏ միասին պաշտպանում էր ԼՂՀ Ջաբրայիլի մարտական դիրքը: 

Անհետ կորած զինվորների ցուցակում գտնվող սերժանտ Ադամ Սահակյանի վերադարձին ողջ հայությունն էր սպասում. մինչեւ վերջին վայրկյանը…
Երբ հայտնի դարձավ, որ մոտ 5 ժամ անհավասար պայքար մղելով հակառակորդի դեմ՝ հերոսաբար ընկել է իր զինակիցների հետ, թշնամուն պատճառելով զգալի կորուստներ՝ կասեցնելով նրանց առաջխաղացումը:

Մեզ հետ զրույցում ՀԵՐՈՍԱԾԻՆ ՄԱՅՐԸ` տիկին Գայանեն,  հիշեց  թե ինչպես էր ապագա ՀԵՐՈՍԻՆ բանակ ճանապարհում.

-Երբ Ադամիս բանակ էի ճանապարհում. մի փոքր հուզմունք կար, տագնապ, բայց նաեւ չափից մեծ հպարտություն: Ինչ իմանայի, որ տարիներ անց...Ոչ բոլորին է բախտ վիճակվում այդքան երիտասարդ տարիքում կատարել իր առաքելությունը։ Ես Ադամին ընդունում եմ այնպես, ինչպես կար. նրան անձնազոհության համար չեմ դատապարտում…

Միայն հպարտ եմ, որ այդքան երիտասարդ եւ այդքան կայացած բնավորություն տեր որդի եմ լույս աշխարհ բերել: Պատահական չէր, որ որդիս հայ առասպելական հերոսներին շատ էր ուսումնասիրում:

-Տիկին Գայանե, ցավոք չորս տարի անց, ոսոխ թշնամին կրկին թիրախավորեց մեր սահմանները, խաղաղ բնակչությանը, որի արդյունքում  ցավոք, ունեցանք հարյուրավոր զոհեր:

-Այո, թշնամուն մի բան կասեմ. Հայը, մարտնչող ազգ է. ոչ մի գերժամանակակից զենք ու ոչ մի վարձկան՝ չի կարող ծնկի բերել հայ զինվորին, եւ ես դա ասում եմ՝ որպես հերոսի մայր: Մայր, ով պատրաստ է զենք վերցնել, եւ կանգնել մեր տղաների կողքին:

Գիտեք, ներկայիս երիտասարդներն անփոխարինելի են: Ու պարտադիր չէ` նրանք կլինեն մարտի դաշտում,  թե  սահմանին կանգնած, որ ասենք հերոսներ են։ Ոչ, մեր կողքին կան երիտասարդներ, որ այնքան մեծ բան են անում… ու հենց այդ տեսակի շնորհիվ է, որ երկիրը, աշխարհը չարությունից չի պայթում։

Ողջ զրույցի ընթացքում ակնհայտ էր, որ Տիկին Գայանեի կորստի ցավը դեռեւս չի մեղմացել. այսօր էլ դժվարությամբ է հավատում, որ Ադամը չկա… Բայց հպարտ է, որ ունի ՀԵՐՈՍ ԶԱՎԱԿ: Այո, ներկայով է միշտ տիկին Գայանեն խոսում որդու` ՀԱՅ ԱԶԳԻ ՀԵՐՈՍ ԱԴԱՄ ՍԱՀԱԿՅԱՆԻ մասին:

Հ.Գ

ՍԻՐԵԼԻ ԱԴԱՄ, ՍԻՐԵԼԻ ՄԵՐ ՀԵՐՈՍՆԵՐ, ՄԵՐՕՐՅԱ ՄՈՆԹԵՆԵՐ, ՄԵՐ ՀԵՐՈՍ ՄԱՅՐԵՐ…
ԵՐԱԽՏԱՊԱՐՏ ԵՆՔ, ՊԱՐՏԱԿԱՆ ՈՒ ՀՊԱՐՏ, որ ՁԵՐ ՇՆՈՐՀԻՎ ԱՊՐԵԼ ԵՒ ՇԱՐՈՒՆԱԿԵԼՈՒ Է ԱՊՐԵԼ ՀԱՅԸ:
ՓԱՌՔ ՈՒ ՊԱՏԻՎ ՄԵՐ ԲՈԼՈՐ ՀԵՐՈՍՆԵՐԻՆՙ ՓԱՌՔ ՈՒ ՊԱՏԻՎ ՄԵՐ ՀԵՐՈՍ ՄԱՅՐԵՐԻՆ, ՈՐ ԱՌՅՈՒԾ ՈՐԴԻՆԵՐ ԵՆ ԾՆԵԼ:

ՆՈՆԱ ԱԴԱՄՅԱՆ 

NEWSmEDIA.am 

Լուրեր Աշխարհից եւ Հայաստանից