«Մենք կորցրինք ոչ միայն տարածքներ, հինգ հազար կյանքեր, արժանապատվություն, մենք վտանգել ենք անկախ պետականությունը». Հայկ Բաբուխանյան

Արցախյան այս պատերազմն սկսվելուց ուղիղ երկու ամիս անց, Եռաբլուրում Ղրիմի երկրապահի նախաձեռնությանը միացել էր նաեւ ՍԻՄ կուսակցությունը, որի ղեկավար Հայկ Բաբուխանյանը Aravot.am-ին ասաց. «Կատարվեց այն, որ 2018 թվականին Հայաստանում իշխանությունը զավթվեց մի խումբ հանցագործների կողմից, որոնք մոլորեցրին ժողովրդի մի որոշ մասի, ու այդ մասը չլսեց այն քաղաքական գործիչներին, որոնք գիտեին, թե ինչ է կատարվում: Մենք զգուշացնում էինք, որ Արցախն են տալու, որ հայությունն են ոչնչացնելու, որ փչացնելու են հարաբերությունների մեր միակ ու գլխավոր դաշնակցի հետ, ինչը բերելու է մեր անվտանգության մակարդակի կտրուկ նվազման, որ փչացնելու է հարաբերությունները նաեւ մյուս երկրների հետ: Տապալելով տնտեսությունը, պառակտելով ժողովրդին, արժեզրկելով ազգային գաղափարախոսությունը եւ արժեքները, պատերազմում մեր զոհված հերոսներին, ի վերջո, Հայրենիք հասկացությունը՝ բերեցին նրան, որ թույլ, անփորձ, առանց փորձառու գեներալների, առանց լուրջ դիվանագետների, երկիրը հասցրեցին այն օրվան, որ թշնամին օգտվելով այդ ամենից՝ գործեց այս հարձակումը: Ազգը նետվեց կռվի ու ցույց տվեց, որ մարտի դաշտում հերոս ենք: Բայց եղավ դավաճանություն: Ի հայտ եկան եւ էլի կգան զարհուրելի փաստեր, որոնք հասցրել են այս ծանր հարվածը: Իսկ այդ հարվածն այն էր, որ կորցրեցինք ոչ միայն տարածքներ, արժանապատվություն, ոչ միայն լավագույն տղերքի հինգ հազար կյանքեր, մենք վտանգել ենք անկախ պետականությունը: Այն կրճոնները, որ թողեցին Հայաստանին, դրանք Հայաստանի պաշտպանության, անվտանգության համակարգի մի մասն էր, այդ կրճոնները պահելը, անհասկանալի ձեւով գծած սահմանները պահելը, մեր անվտանգությունը դարձրել է խիստ դժվար: Իսկ եթե երկիրը չի կարողանում պահել իր անվտանգությունը, իր անկախությունը բավականին պայմանական է: Հիմա առաջին հերթին Նիկոլը եւ իր շրջապատը պետք է րոպե առաջ հեռանան եւ դատվեն: Բայց այսօր պետք է լուրջ մտածել, թե ինչպիսին պետք է լինի Հայաստանի ապագայի տեսլականը: Որովհետև այն, ինչ տեսնում էինք վերջին 30 տարիներին, այն, ինչ կառուցում էինք, ազգովի պատկերացնում էինք, այդ ուղին այլեւս արգելափակվեց: Այդուհանդերձ, ազգի էլիտան, մտավորականությունը հոգեւորական դասը պետք է նստեն եւ մտածեն, թե որ ճանապարհն է պետք ընտրել: Դա այսօրվա հրամայականն է, եւ մենք չունենք շատ ժամանակ: Որովհետեւ ամենաշատը հինգ տարուց հետո նորից սկսվելու են իրադարձություններ, որոնք նորից մարտահրավերներ են լինելու մեր ազգի համար»:

Աշոտ ՀԱԿՈԲՅԱՆ

Ամբողջական հոդվածը կարող եք կարդալ այս հասցեով՝ https://www.aravot.am/2020/11/27/1155201/