Լրագրողը գործել է օրենքի սահմաններում, եղել է բարեխիղճ. Իշխանական պատգամավորն ընդդեմ լրատվամիջոցի եւ լրագրողի դատական ակտը կհրապարակվի մարտի 2-ին

Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում` դատավոր Ա. Ստեփանյանի նախագահությամբ  շարունակվում է «Իմ քայլը» խմբակցության պատգամավոր, լայն շրջանակներում հայտնի որպես Շիշ բռնող, խոսքի ազատության դեմ հանդես եկող ամենակարկառուն իշխանական երեսփոխան Հայկ Սարգսյանի հայցի քննությունը ընդդեմ «Իրավունք Մեդիա» ՍՊԸ-ի եւ լրագրող Իլոնա Ազարյանի դեմ դատաքննությունը:

Հիշեցնենք` դատական հայցի հիմքում «Իրավունք» թերթի` մայիսի 14-ին հրապարակված հոդվածն է, որտեղ նշվում է, որ «Դավիթ Սանասարյանի դեմ ողջ ինֆորմացիոն փաթեթը ԱԱԾ-ին է հասել Հայկ Սարգսյանի թեթեւ ձեռքով»: Հայցվոր կողմը վիրավորանք եւ զրպարտություն է համարում հոդվածում տեղ գտած ամբողջ տեղեկությունը եւ որպես ոչ նյութական վնասի փոխհատուցում մինչեւ 1 մլն դրամ գումար է պահանջում:

Նշենք, որ «Իրավունք Մեդիա» ՍՊԸ-ի եւ լրագրող Իլոնա Ազարյանի շահերի ներկայացուցիչն է մի շարք աղմկահարույց գործերով հայտնի փաստաբան, «Լեւ Գրուպ» փաստաբանական ընկերության հիմնադիր ԼԵՎՈՆ ԲԱՂԴԱՍԱՐՅԱՆԸ, իսկ հայցվոր կողմի փաստաբանն է ՏԻԳՐԱՆ ՀԱՅՐԱՊԵՏՅԱՆԸ:

Այսօր կայացած դատաքննության փուլում հայցվորի ներկայացուցիչ, փաստաբան Տիգրան Հայրապետյանը խոսեց ատելության քարոզից: Մասնավորապես, որ պետք է պայքարել նման երեւույթի դեմ: Ապա դատարանին անուղակի կերպով "մեղադրեց" այս դատական գործը իր իսկ խոսքերով. «շուրջ երկու տարի» քննելու մեջ:

Հայցվոր կողմի ներկայացուցիչը անդրադառձավ նաեւ հայցադիմումին, մասնավորապես ընդգծելով, որ իր վստահորդը կհասկանար լրագրողին եւ լրատվամիջոցին եթե քննադատվեր վերջինիս քաղաքական գործունեությունը:

Հայցվոր կողմի վերը նշված նկատառումներին դիպուկ կերպով հակադարձեց «Իրավունք Մեդիա» ՍՊԸ-ի եւ լրագրող Իլոնա Ազարյանի շահերի ներկայացուցիչն է փաստաբան Լեւոն Բաղդասարյանը մատնանշելով.

- Ինքս, որպես քաղաքացի հետեւում եմ բոլորի գործունեությանը: Չունենալով Հայկ Սարգսյանի անձի նկատմամբ բացարձակ որեւէ վերաբերմունք, սակայն, այս ընթացքում չեմ հիշում որեւիցէ մի դեպք, երբ Հայկ Սարգսյանը որեւէ մի օրենքի հետ կապված հրապարակային ելույթ ունեցած լիներ: Ավելին, ըստ մամուլի, բազմաթիվ են Հայկ Սարգսյանի հետ կապված կոնֆլիկտային միջադեպերը: Եվ, եթե Հայկ Սարգսյանին թվում է, որ դա չպետք է լուսաբանվի լրատվամիջոցների կողմից, ապա սխալվում է: Որովհետեւ եւ ՄԻԵԴ որոշումներով եւ այլ նախադեպային որոշումներով քաղաքական գործիչը միշտ պետք է լինի խոշորացույցի տակ` հատկապես իշխանական ներկայացուցիչը:

Անդրադառնալով ատելության քարոզի դեմ պայքարելուն հայտնի փաստաբանը փաստեց.

-Միանշանակ պետք է մշակույթ ձեւավորել, որպեսզի ատելության քարոզը բացառվի: Ինքս, որպես իրավաբան պայքարում եմ դրա դեմ: Բայց եթե համեմատական ենք անցկացնում ներկա եւ նախկին իշխանությունների օրոք ատելության քարոզի հետ կապված, ապա գտնում եմ, որ վերջին շրջանում մի քանի անգամ ատելության քարոզը գերազանցեց նախորդ իշխանությունների ժամանակվա  ատելության քարոզից, որի ուղղակի կրողը ներկա իշխանությունն է, որը զարգացրեց ինչպես ատելության քարոզը, այնպես էլ ընտրովի, փողոցային արդարադատությունը:

Պատասխանող կողմի ներկայացուցիչը չշրջանցեց նաեւ հայցվորի կողմից մատնանշած դատավարության ձգձգմանը ընդգծելով.

- Դրա ուղղակի կրողը եւս գործող իշխանությունն է եւ կապ չունի, թե ով է կանգնած իշխանության բուրգում: Որովհետեւ բազմաթիվ գործեր կան, որ եթե գործադիրը կարողանար նորմալ աշխատեր եւ իր պարտավորությունները կատարել` բազմաթիվ գործեր այսօր չէին հանգրվանի դատարաններում: Ուստի այդ հարթակում եւս ուղղակի պատասխանատվություն ունի այն իշխանությունը, որի կրողը համարվում է հայցվորը:

Դատաքննության ավարտին կողմերը եւս մեկ անգամ հայտնեցին իրենց դիրքրոշումները:

«Իրավունք Մեդիա» ՍՊԸ-ի եւ լրագրող Իլոնա Ազարյանի շահերի ներկայացուցիչ, փաստաբան պարոն Բաղդասարյանը եւս մեկ անգամ փաստեց պնդեց իր դիրքորոշումը ինչպես մեդիային, որպես պատասխանող ներգրավվելու, այնպես էլ լրագրողի դեմ ներկայացված հայցի վերաբերյալ նկատելով.

-Լրատվամիջոցին դատակոչելով որպես պատասխանող, այն դեպքում, երբ առկա հոդվածագրի եւ հեղինակի ստորագրությունը` ուղղակիորեն փորձ է արվում լռեցնել այն լրատվամիջոցին, որը տվյալ դեպքում հայցվորի քիմքին հարիր չէ:

Ինչ վերաբերում է լրագրող Իլոնա Ազարյանի դեմ ներկայացված հայցին, ապա լրագրողը գործել է օրենքի սահմաններում, եղել է բարեխիղճ: Ավելին, հոդվածը հրապարակելուց հետո լսել է հայցվորի կարծիքը եւ այդ կարծիքը եւս տպագրել է: Նման պարագայում` հաշվի անելով ՄԻԵԴ մի շարք որոշումներ գտնում եմ, որ Իլոնա Ազարյանի մասով եւս հայցը իրավաչափ չէ եւ ենթակա է մերժման:

Դատական ակտը կհրապարակվի մարտի 2-ին:

ԻԼՈՆԱ ԱԶԱՐՅԱՆ

Iravunk.com