ՓԱՇԻՆՅԱՆԸ ՎԱՂՈՒՑ Է ԿՈՐՑՐԵԼ ՀԱՅ ԺՈՂՈՎՐԴԻ ԱՆՈՒՆԻՑ ԽՈՍԵԼՈՒ ԲԱՐՈՅԱԿԱՆ ԼԵԳԻՏԻՄՈՒԹՅՈՒՆԸ. ԱՆՈՒՇԱՎԱՆ ԴԱՆԻԵԼՅԱՆ

Նիկոլ Փաշինյանի հայտարարությունը՝ «Իսկանդեր» օպերատիվ-տակտիկական համալիրի իբր չպայթած հրթիռների մասին ինչպե՞ս կարող է անդրադառնալ ռուս-հայկական հարաբերությունների վրա: Հարցի պատասխանը  «Իրավունքը» փորձել է ստանալ Արցախի Հանրապետության նախկին վարչապետ ԱՆՈՒՇԱՎԱՆ ԴԱՆԻԵԼՅԱՆԻՑ: Մեր զրուցակիցը նախ հիշեցրեց, թե իրականում ինչ է իրենից ներկայացնում «Իսկանդերը».

-Նախ պետք է ընդգծել, որ «Իսկանդերը» ՌԴ ռազմարդյունաբերական ոլորտի վերջին սերնդի հրթիռային համակարգերից է, որն իր ծանրակշիռ տեղն ունի այդ համակարգում: Այն նաեւ Ռուսաստանի, որպես ժամանակակից ռազմարդյունաբերության գերհզոր պետության, միջազգային վարկանիշը ձեւավորող զինատեսակներից մեկն է: Երկրորդ. ես կարծում եմ, որ Փաշինյանի այդ արտահայտությունը՝ «Ինչո՞ւ կրակած «Իսկանդերը» չի պայթել կամ պայթել է 10 տոկոսով», ոչ թե նրա չիմացության կամ կոմպետետության պակասի արդյունք է, ինչին, իհարկե, մենք ականատես ենք եղել բազմիցս, այլ նախօրոք մտածված, միտումնավոր հարված էր Հայաստանի ու Արցախի փաստացի միակ անվտանգության երաշխավոր, մեր ռազմավարական դաշնակից Ռուսաստանի Դաշնությանն ու նրա միջազգային վարկանիշին: Փաշինյանը զգում է, պատկերավոր ասած, իր մոտալուտ «վախճանը» վարչապետի պաշտոնում: Նրա բոլոր գործողություններն ուղղված են իմիտացիոն տպավորություն ստեղծելուն, թե ինքը շարունակում է ղեկավարել երկիրը, գիտակցելով, որ իր օրերը հաշված են: Սակայն նրա տերերը նրան իշխանության էին բերել, ըստ իս, մեկ բանի համար՝ դուրս մղել Ռուսաստանին Հարավային Կովկասից եւ ապահովել ՆԱՏՕ-ի ուժերի տեղակայումը մեր տարածաշրջանում: Փաշինյանը կատարեց իր վրա դրված առաջադրանքի մի մասը միայն՝ հանձնելով Արցախի 9 շրջանները եւ արդյունքում՝ ապահովելով ՆԱՏՕ-ի անդամ, մեր դարավոր թշնամի Թուրքիայի մուտքը Հարավային Կովկաս: Բայց այդուհանդերձ, չնայած իր թիմի իշխանության գալու առաջին իսկ օրվանից հակառուսական ակցիաներին ու հայտարարություններին, այդպես էլ չկարողացավ կատարել իր գլխավոր առաքելությունը՝ ստեղծելով հակառուսական տրամադրություններ մեր ժողովրդի մեջ, դուրս մղել Ռուսաստանին Հայաստանից, հետեւաբար՝ ամբողջ Հարավային Կովկասից, որտեղ հաստատվելու համար վերջին 200 տարվա ընթացքում Ռուսաստանը ռուս-պարսկական եւ ռուս-թուրքական պատերազմներում ավելի քան 1,5 մլն. զոհ է տվել՝ ապահովելով իր հարավային սահմանները: Հիմա Փաշինյանը, զգալով իր մոտալուտ անկումը եւ հասկանալով, որ իշխանափոխությունից հետո ինքը իր թիմի հետ հայտնվելու է մեղադրյալի աթոռին, որոշել է իբր հարվածելով Ռուսաստանի միջազգային վարկանիշին, վերջին ծառայությունները մատուցել իր տերերին՝ ակնկալելով նրանցից փոխհատուցում՝ ի դեմս իր ու իր ընտանիքի համար երաշխավորված ապագայի որեւէ արեւմտյան երկրում: Բարեկամ Ռուսաստանի, ինչպես նաեւ Հայաստանի պետական, քաղաքական եւ հասարակական շրջանակների ներկայացուցիչների արձագանքը Փաշինյանի տվյալ հայտարարությանը եւս մեկ անգամ հաստատում է, որ նա վաղուց արդեն կորցրել է հայ ժողովրդի եւ Հայաստանի անունից խոսելու բարոյական լեգիտիմությունը:

ԻԼՈՆԱ ԱԶԱՐՅԱՆ

Iravunk.com