էրդողանի ներկայացուցիչը նախազգուշացրել է ԱՄՆ-ին ճնշում չգործադրել Թուրքիայի վրա S-400-ների պատճառով

ԱՄՆ-ի կողմից ճնշումը Թուրքիայի վրա Ռուսաստանից S-400 զենիթահրթիռային համակարգերի ձեռք բերման կապակցությամբ կարող է հակառակ հետեւանքներ ունենալ: Նման կարծիք է հայտնել Թուրքիայի նախագահի պաշտոնական ներկայացուցիչ Իբրահիմ Կալինը կիրակի օրը Bloomberg գործակալության հրապարակված հարցազրույցում:

«Երբ մեկ այլ երկիր գալիս է մեզ մոտ մաքսիմալիստական ​​դիրքորոշմամբ եւ պահանջներ է առաջադրում` «կա՛մ կլինի մեր ձեւով, կա՛մ ընդհանրապես չի լինի» ոճով, ապա այդպիսի մոտեցումը մեզ այլ ուղղությունների է մղում»,- մեջբերում է գործակալությունը թուրք  առաջնորդի ներկայացուցչի խոսքը: Նրա խոսքով` Թուրքիայի եւ Ռուսաստանի միջեւ որոշակի տարաձայնություններ կային, «սակայն դրանք վերացվեցին կառուցողական երկխոսության միջոցով»: «Ինչո՞ւ մենք չենք կարող նույնը անել Միացյալ Նահանգների հետ»,- հարցրել է Կալինը: