Ողբերգություն չէ, երբ իշխանությունները պարտվում են, ողբերգություն է, երբ պարտված իշխանությունները ամեն գնով մնում են կառչած իրենց աթոռներին

«Իրավունքի» զրուցակիցն է Արցախի հանրապետության «Արդարություն » կուսակցության համանախագահ ՀԱԿՈԲ ՀԱԿՈԲՅԱՆԸ:

-Պարոն Հակոբյան, որպես «Արդարություն » կուսակցության համանախագահ, ի՞նչպես եք տեսնում Արցախի հարցի կարգավորման հեռանկարը:

-Արցախի «Արդարություն » կուսակցությունը բազմիցս նշել է, որ Արցախի Հանրապետությունը այլևս կայացած պետություն է, իր բոլոր պետական ինստիտուտներով, այլ բան է, որ միջազգային հանրությունը դեռևս չի ճանաչել այս ակնհայտ իրողությունը: Այո, Արցախի դեմ Ադրբեջանի 44-օրյա ագրեսիայի արդյունքում տարածաշրջանում իրավիճակի և ուժերի դասավորության փափոխությամբ պայմանավորված՝ անհրաժեշտություն է առաջացել զգալի ճշգրտումներ մտցնել արտաքին քաղաքականության հրամայականների մեջ, նոր մարտահրավերներին դիմակայելու համար, սակայն պատմությունը բազմաթիվ անգամ ապացուցել է, որ Արցախի հարցը պատերազմով հնարավոր չէ լուծել և այն պետք է լուծվի դիվանագիտական ճանապարհով՝ այլ հարց է, թե արդյոք օրվա իշխանությունները, թե՛ Հայաստանի և թե՛ Արցախի ունեն այդ հնարավորությունները և կամքը:

-Կոնկրետ Ձեր կուսակցությունը ի՞նչ քայլեր է ձեռնարկում խնդիրը բարձրաձայնելուն ուղղված:

-Արցախի «Արդարություն » կուսակցությունը իր գոյության ողջ տարիների ընթացքում ռազմավարական գերխնդիր է համարել Արցախի Հանրապետության աշխարհաքաղաքական սուբեյկտայնության պահպանումը, որի դեմ կարծես թե հատուկ պայքարում էր Հայաստանյան իշխանությունը վերջին 3 տարիների ընթացքում: Արցախի Հանրապետության նախագահին մարզպետ անվանելը, Հայաստան Արցախ պաշտոնական հանդիպումներին Արցախի դրոշի բացակայությունը և նմանատիպ բազմաթիվ երևույթներ, որոնց մասին բազմիցս մենք խոսել ենք մինչև պատերազմը: 2020թվականի ընտրություններից հետո երբ մեր կուսակցության անդամները ահազանգում էին մոտալուտ պատերազմի և այս իշխանությունների ապիկար պաշտոնավարման մասին, երբ հայտարարում էինք, որ Նիկոլ Փաշինյանի դրսևորած դիվանագիտական վարքագիծը բերելու է աղետի՝ Ստեփանակերտում մեր անդամների նկատմամբ քրեական գործեր էին հարուցվում:

- Ի՞նչ մարտահրավեր են նետված Արցախի Հանրապետության առաջ այսօր:

-Երբ մարդը հարմարվում է մի իրավիճակի, հետագայում դրա դեմ պայքարելն ու փոխելը շատ դժվար է լինում: Այդպես էր օրինակ, երբ մենք հաղթական և գերիշխող դիրքերում էինք: Մենք հարմարվել էինք, թուլացրել զգոնությունը, երբեմն մոռանում, որ մի քանի մետրի վրա թշնամին է: Այսօր, երբ պարտվել ենք պատերազմում, բարոյալքվել և գտնվում ենք ներքաղաքական ցնցումների մեջ, ցավոք սրտի կրկին սկսել ենք հարմարվել: Չհարմարվել՝ սա է մեր համար մեկ մարտահրավերը: Ողբերգություն չէ, երբ երկրի իշխանությունները պարտվում են, ողբերգություն է, երբ պարտված իշխանությունները ամեն գնով մնում են կառչած իրենց աթոռներին: Նիկոլ Փաշինյանը և Արայիկ Հարութունյանը այսօր դիմում են ամեն մի թույլատրելի և անթույլատրելի քայլի, որպեսզի պահպանեն իրենց իշխանությունը: Հեռացնել պարտված իշխանություններին՝ սա էլ մեր մյուս մարտահրավերը: Իսկ մնացած խնդիրները՝ լինեն դրանք արտաքին քաղաքականության ոլորտում, ռազմական ոլորտում, սոցիալական ոլորտում, պետական կառավարման ոլորտում՝ նոր, հայերեն մտածող և ազգային պատական շահը ամեն ինչից վեր դասող կառավարիչները և բանակցողները կկարողանան լուծել: Այս ուղղությամբ մեր կուսակցությունը ունի հստակ ճանապարհային քարտեզ, որտեղ մատնանշված են այն առաջնահերթ քայլերը, որոնք օդ ու ջրի պես պետք են Արցախի Հանրապետությանը և այն մենք ներկայացնելու ենք Մայիսի 2-ին կայանալիք մեր հերթական համագումարում:

Մանրամասն՝Iravunk.com 

Զրույցը՝ԻԼՈՆԱ ԱԶԱՐՅԱՆԻ