Երևանում կա ևս մեկ Բոինգ-737`գրանցված Fly Armenia ընկերությունում, բայց կրում է ղազախական պետական գրանցման նիշ. Ճաղարյան

Ավելի, քան 2 ամիս առաջ ես հայտարարություն տարածեցի, որ առևանգվել է, կամ խաբեությամբ Իրան է տարվել հայկական EK-FAA գրանցմամբ Բոինգ-737 օդանավը: Ես նշեցի նաև, որ սա ՀՀ ավիացիոն իշխանությունների հանցավոր, միտումնավոր անգործության արդյունք է: Այս մասին ֆեյսբուքյան իր էջում գրել է Նիկոլ Փաշինյան ի նախկին խորհրդական Հակոբ Ճաղարյանը:

«Եվ, որ դրա արդյունքում Հայաստանը ամրագրում է իր տեղը համաշխարհային ավիացիայի «սև ցուցակում», ու կարող է ենթարկվել ԱՄՆ պատժամիջոցների:

Անցած երկու ամիսների ընթացքում բազմաթիվ լրատվամիջոցներ անդրադարձան այս հարցին: Ոչ մի օր շունչ քաշելու հնարավորություն չտվեցին այս խաբեության հեղինակներին և իրենց պասիվությամբ նրա իրականացմանը սատարող պետական պաշտոնյաներին:

Բոլորին հասկանալի դարձավ կատարվածի ամբողջ իմաստն ու խորությունը:

Հայտարարությամբ հանդես եկավ ԱՄՆ դեսպանատունը…

Մի խոսքով, մենք` ձեր օգնությամբ, հարգելի լրագրողներ և սիրելի հանրություն, հասանք գլխավոր նպատակին.

-Օդանավը վերադարձվեց Հայաստան,

-Հայաստանը խուսափեց ԱՄՆ հավանական պատժամիջոցներից.

Բայց խնդիրը դեռ վերջնական լուծում չի ստացել: Նախ և առաջ` դեռ չի պարզաբանվել, թե ինչպե՞ս այս գործարքը տեղի ունեցավ:

Այս ամեն ինչը իրենց ապիկարությամբ ու հանցագործ անգործությամբ սատարած պետական չինովնիկները հպարտությամբ են հայտարարում, որ տեսա՞ք, կարողացանք հետ բերենք: Տեսանք: Տեսանք, որ դա ԱԳՆ չարչարանքի արդյունքում ստացվեց:

Իսկ ցույց կտա՞ք տեսնենք, թե ո՞նց այդ առևանգումը հնարավոր դարձավ իրագործել:

Վարչապետի պաշտոնակատարը կբացատրի՞, թե ոնց ու ինչու՞ իր վարչապետ եղած ժամանակ մատների արանքով անգամ չնայեց իր սեղանին դրած, ԱԱԾ հետաքննության ուղարկած Զեկուցագրին, որում բառացիորեն նկարագրված էր այս սցենարը:

Երևանում մի հատ էլ կա այս օդանավից, գրանցված Fly Armenia ընկերությունում, բայց չգիտես ինչու, կրում է ղազախական պետական օդանավերի գրանցման UN-…. նիշը: Այդ մեկը չի պատրաստվո՞ւմ Իջևանի վրայով որևէ տեղ, ասենք` Օման, թռչելու: Ու կա՞ գարանտիա, որ սա էլ Թեհրանում վթարային վայրէջք չի կատարելու:

Հիշեցնեմ, որ 2019 թ հուլիսի սկզբին ձեր խոնարհ ծառան ՀՀ ՔԱԿ նախագահի նախկին տեղակալ Արսեն Պողոսյանի հետ համագործակցությամբ կանխեց կեղծ կիրգիզական գրանցմամբ Աէրոբուս-310 օդանավի նմանատիպ առևանգման փորձը…

Դե, հարցեր էլի կան, իհարկե: Բայց այսքանի պատասխանն առ այժմ կբավարարեր ինձ»,- գրել է Ճաղարյանը: