«Ես չգիտեմ Շուշին ինչ ձեւ են հանձնել , որ հիմա Շուշին հետ բերելու համար Ձեզ խոստում տամ».Տիգրան Արզաքանցյան

Դեռւես 2017-ի ընտրական թոհ ու բոհում, իսկ ավելի ստույգ ռեյտինգային ընտրակարգում՝ շատերի պես ընտրապայքարից դուրս մնացած Տիգրան Արզաքանցյանը, 2021-ի արտահերթ խորհրդարանական ընտրություններում, որոշել է կրկին փորձել ուժերը՝ քայլ անելով վերադառնալ դեպի մեծ քաղաքականություն:
Հիշեցնենք, որ 2017-ին ներթիմային մրցակցության արդյունքում, նույնը ինքը՝ ՀՀԿ-ական գործարար Տիգրան Արզաքանցյանը հայտնվեց խաղից դուրս վիճակում, ընտրությունների ժամանակ հավաքելով ընդամենը՝ 3 հազար 900 ձայն:

Եւ թե ինչո՞ւ ՌԴ-ում հաստատված, երկրե-երկիր ճանաչում, փառք ու հարստություն ձեռք բերած Արզաքանցյանը, որոշեց կրկին փորձել «բախտը»` այս ընտրություններում, NewsMedia.am-ը փորձեց այս եւ այլ հարցերի պատասխանները ստանալ անձամբ ապագա մեծ քաղաքական գործչից, ով նախ արձագանքելով այն հարցին, թե արդյո՞ք ճիշտ են տարածված այն լուրերը որ գործարարը գնել է «Ժառանգություն» կուսակցությունը, պատասխանեց.

-Տենց բան չկա, ես «ժառանգություն»-ը չեմ գնել: Իրանց հետ էլ, ես հիմա բանակցությունների մեջ չեմ: Ասեմ, որ իմանաք: Շուտով, մի քանի օրվա ընթացքում՝ ես կհայատարարեմ իմ կուսակցության մասին:

-Իսկ ի՞նչ է Ձեր կուսակցության անունը: Այսինքն, դուք բոլորովին նոր կուսակցություն ե՞ք բացում, թե՞ ինչ-որ մեկ այլ հին, գուցեեւ մոռացված կուսակցությանը նոր շունչ, կյանք եւ անուն եք ուզում տալ:

-Ոչ, իմ կուսակցությունն ա.գնած չի, խումբ կա, քաղաքականություն կա, գաղափար կա, ծրագիր կա, հոգի կա:

-Ո՞ւմ «հոգին» կա, պարոն Արզաքանցյան…

-Լավ էլի… իմ հոգին, ժողովրդի հոգին կա:

-Իսկ Ձեր «հոգում» ի՞նչ ծրագիր ունեք.հանուն ժողովրդի,հանուն մեր երկրի, հանուն մեր ապագայի: Կարող ե՞ք, մեկ-երկուսը թվարկել:

-Շուտով, շուտով կիմանաք, օրինական Ձեզ կասեմ, լրիվ կհայտարարեմ:

-Իսկ ի՞նչ սպասումներ ունեք անձամբ դուք՝ այս ընտրություններից, մանդա՞տ, թե՞ պետական պաշտոն եք օրինակ ակնկալում:

-Ոչ, ոչ, մենք լրիվ գնում ենք քաղաքական աշխատանքներ կատարելու:

-Հասկանալի է, բայց կոնկրետ, ի՞նչ հավակնություններ ունեք, կասե՞ք:

-Տիգրան Արզաքանցյանը լինելու է էդ խմբի մեջ, խումբը ղեկավարողն եմ լինելու, ու եթե համագումարում ընտրվեմ՝ մենք մեր ծրագրով կաշխատենք: Տիգրան Արզաքանցյանը՝ պաշտոնի կարոտ չի:

-Բա ինչի՞ «կարոտ» եք՝ որ որոշեցիք վերադառնալ քաղաքականություն:

-Ես ուզում եմ իմ հանրապետությանը, իմ երկրին սիրած՝ որտեղ ծնվել-մեծացել եմ, իմ գիտելիքներով պետք գամ, որովհետեւ ես հիմա տեսնում եմ. ինչ ա կատարվում: Ես իմ երկիրը սիրում եմ:

-Ձեր երկիրը սիրում եք, բայց կարծես թե մշտապես ՌԴ-ում, արտերկում եք լինում. արարում, ստեղծում, ուրախանում…

-Ես աշխարհի մարդ եմ:

-Հա, աշխարհահռչակ եք…

-Ախր, ես մենակ մի տեղ ապրող մարդ չեմ. ես գնում եմ գործերով: 22 երկրներ… ընկերություն ա, կարողանում ապրանքը վաճառել՝ առանց գնալ-գալու: Տարբեր երկրներ, օտար երկրներ , առանց բանակացությունների, ո՞վ կարա անի՝ ասա:
Եթե էդ չլիներ, ես ո՞նց կբերեի Հայաստանում աշխարհի խոշոր կազմակերպություններից մեկը, որը Հայաստանի բյուջեում միշտ առաջին տեղում ա եղել: «Վիվա-ՄՏՍ»-ին, որ բերեցի.էդքան սոցիալական աշխատանքներ ա կատարել Հայաստանում : էդի սաղ՝ Արզաքանցյանի շնորհիվ ա:  Աշխարհի որ երկիր ես գնամ՝ աշխարհի քաղաքական գործիչների , բոլոր միլիարդատերերի,աշխարհի միլիարդատերերի հետ ես ունեմ կապ:

-Իսկ Ձեր միլիարդատեր ընկերների միլիարդներից, նպատակ չունե՞ք ապագայում Հայաստանում նոր ներդրումային ծրագրեր իրականացնել: Դուք էլ գիտեք, որ Հայաստանի տնտեսությունը կոլապսի մեջ է:

-Այո, էդ իմ նպատակն ա: Ուրեմն ես ունեմ 15-ից ավել միլիարդատերեր, ովքեր պատրաստ են լավ ձեւավորված քաղաքական ուժի հետ՝ գնալ բանակցությունների: Ամեն մեկն իր ներդրումներով՝ տարբեր ոլորտներում գործեր կարող ա անի:

-Պարոն Արզաքանցյան, իսկ հնարավո՞ր է Ձեր պատկերացրած քաղաքական իշխանությունը ձեւավորելու համար, դուք էլ այս կամ այն ուժի հետ դաշինք կազմեք:

-Ոչ, ոչ, ես նման բան չեմ պատկերացնում: Տենց բան չկա:

-Իսկ այս նախընտրական թոհ ու բոհի կարեւորագույն շրջանում, հանդիպումներ չե՞ք ունեցել օրինակ Ռոբերտ Քոչարյանի, կամ Սերժ Սարգսյանի հետ:

-Չէ, ես հանդիպումներ չեմ ունեցել, ոչ, ոչ,ոչ:

-Ցանկություն չունե՞ք երկրի նախկին ղեկավարներին հանդիպելու, թե՞ նրանք Ձեզ չեն հրավիրել հանդիպման:

-Ես ոչ մեկի հետ ցանկություն չունեմ հանդիպելու: Ես ունեմ իմ ծրագիրը, ես իմ ծրագրով շարժվում եմ:

-Իսկ դուք հավատում ե՞ք, որ Ձեր կուսակցությունը՝իր ծրագրով այս ընտրություններում կհաղթահարի ընտրական շեմը:

-Գիտեք ոնց, ես բարձր խոսքեր չեմ ուզում ասել, որովհետեւ ամեն ինչի կախված ա մեր ժողովրդից: Հույսս՝ չեմ կորցնում ես:

-Լավ, իսկ հանուն ինչի ժողովուրդը պետք է գա Ձեր եւ Ձեր կուսակցության ետեւից:Ի՞նչ կերպ եք օրինակ համոզելու ժողովրդին, որ դուք եք վստահելին եւ լավագույնը:Ի վերջո, ընտրապայքար է…

-Ես համոզելու բան չունեմ: Մենք կներկայացնենք մեր ծրագիրը. անհատական կուսակցություն չի լինելու, ստեղ խումբ ա լինելու քաղաքական, աշխատանք է կատարվելու, լավ բարի գործեր ենք անելու:Ես էլ լավ գործեր եմ անելու: Մենք հիմա մեր ուժերը պիտի ներդնենք, եւ ցույց տանք թե ինչի ենք պատրաստ հանուն հայրենիքի:
Մեր երկիրը վիրավոր ա. մենք պետք ա արհեստավարժ մարդիկ դնենք կառավարության մեջ, պրոֆեսիոնալնի խումբ լինի, որ կարողանանք երկիրը էս վիճակից դուրս բերենք: Ժողովուրդը ցնցումների տակ ա, ժողովրդի հոգեկան վիճակը շատ ծանր ա, դրա համար ես հիմա իմ գործնական կյանքը դնում եմ կողքի, ու համախմբում եմ իմ ընկերներին, որպեսզի առողջ ուժ ստեղծենք ու հզոր երկիր կառուցենք:Հայրենիքի համար ես պատրաստ եմ ամեն ինչի, ամեն զոհողության : Ամեն ինչ կանենք, որ կորցրածը հետ բերենք:

-Իսկ կարո՞ղ է մեր Սրբավայր Շուշին էլ ետ բերեք…զգացվում է՝ մարտական եք տրամադրված:

-Ես չգիտեմ ինչ ձեւ են հանձնել Շուշին, որ հիմա Շուշին բերելու համար Ձեզ խոստում տամ: Շուտ ա էդ մասին խոսալը:
էսօր էսքանը հերիք ա էլի, էսքան խոսացի, մեծ քանակի մարդիկ են նստած,ու ինձ են սպասում, շնորհակալություն:

NewsMedia.am

Լուրեր  Հայաստանից եւ աշխարհից