Կարմիր Շուկայի հատվածում ադրբեջանական ավտոշարասյան բեռնատարները վազանց են կատարել, անցել հանդիպակաց գոտի ու խոչընդոտել երթևեկությունը․ դիմել ենք ռուս խաղաղապահներին․ համայնքի ղեկավար

Կարմիր Շուկա-Սարուշեն-Շոշ-Շուշի ճանապարհով, որից օգտվում են թե՛ հայերը, թե՛ ադրբեջանցիները՝ ռուս խաղաղապահների ուղեկցությամբ, հաճախակի ադրբեջանական բեռնատարների ավտոշարասյուներ են անցնում, որոնցում կարող է 20-60 բեռնատար լինել։ Այս մասին Tert.am-ի հետ զրույցում ասաց Արցախի Կարմիր Շուկա համայնքի ղեկավար Նարեկ Աթայանը։

Աթայանն ընդգծեց՝ ճանապարհը չեն փակել, սակայն երթևեկության խնդիր է առաջացել, ինչի մասին տեղեկացվել են ռուս խաղաղապահները։

Նրա խոսքով՝ համայնքում խուճապ չկա, այս ընթացքում որևէ լուրջ խնդիր չի առաջացել, նաև նոր թաղամաս է կառուցվում։ «Պլանավորված է մոտ 130 տուն կառուցել՝ մասնավորապես Թաղավարդի տեղահանված բնակիչների համար։ Նախատեսված է, որ մինչև տարեվերջ աշխատանքները կավարտվեն»,-ասաց նա։