Պատերազմի թողած անջնջելի հետքն ու դրա հետևանքները հերոս տղաների վրա.«Իրավունք TV»- ի տաղավարում հոգեբան Իրինա Ծատուրյանն է

Ի՞նչպես կարողանալ հաղթահարել մեկը մյուսին հաջորդող հոգեբանական տրավմաները եւ մնալ հոգեբանորեն առողջ, ի՞նչ հետք է թողնելու գերությունը` գերությունից վերադարձած մեր հերոս տղաների հոգեբանական վիճակի վրա, ինչի՞ մասին է խոսում Փաշինյանի մուրճի ցուցադրումը եւ որդուն` Ալիեին հանձնելու հայտարարությունը, ի վերջո հոգեբանական խնդիրներ ունի՞ վարչապետի ԺՊ-ն, թե՞ ոչ, այս եւ այլ հարցերի շուրջ  «Իրավունք TV»-ի ուղիղ եթերի շրջանակում զրուցել ենք հայտնի հոգեբան ԻՐԻՆԱ ԾԱՏՈՒՐՅԱՆԻ հետ, ով նախ անդրադարձավ պատերազմի  հետ առերեսված մեր հերոս տղաների հոգեբանական վիճակին.

- Այս պատերազմի հասցրած հոգեբանական տրավման գրեթե անջնջելի է: Ու ոչ թե նրա համար, որ նրանք թույլ են, ոչ: Պարզապես, երբ մարդը վերադառնում է հաղթած իր  համար շատ ավելի հեշտ է հաղթահարել բոլոր տրավմաները թե՛ հոգեբանական, թե՛ ֆիզիկական, բայց այսօրվա վիճակը, երբ այդքան պայքարից հետո, շատ դեպքերում հաշմանդամ դարձած վերադառնում ես` պարտվածի հոգեվիճակով, սա լրիվ այլ բան է: Չկա այն բացարձակ հաղթողի հոգեվիճակը, որը չափազանց շատ օգնում է հոգեբանական ցանկացած իրավիճակ հաղթահարելու:

-Ի՞նչպես հաղթահարել:

-Դա բավականին երկարատեւ հոգեբանի հետ աշխատանք է պահանջում: Կարեւոր է նաեւ ընտանիքի սերն ու հոգատարությունը, արժեւորված զգալը ընտանիքում: Գուցե զարմանաք, բայց, ցավոք կան ընտանիքներ, ովքեր անուշադրության են մատնում իրենց հերոս տղաներին: Ինքս առնչվել եմ կոնկրետ դեպքի հետ, երբ հայրը դրսում է եւ նա  անգամ չի եկել իր որդուն տեսնելու: Կան դեպքեր, երբ տղաներին արհամարական են բարեւում անգամ բակի տղաները:

- Տիկին Ծատուրյան, մենք իրավունք ունե՞նք գերությունից վերադարձած տղաներին բաց լուսանկարներով ցուցադրել հանրությանը, սա նրանց վրա հետագայում կարո՞ղ է ինչ-ինչ ազդեցություն ունենալ:

-Ոչ բացարձակ իրավունք չունեինք, իրավունք չունենք նաեւ նրանց հետ որոշակի աշխատանք տանելուց հետո կրկին ուղարկել ծառայության:  Գերեւավարված տղաների հոգեբանական տրավմաները գրեթե անջնջելի են. տեսեք նրանք սկզբից պատերազմ են տեսել, հետո գերեւվարվել ու մենք չգիտենք, թե ինչերի միջով են անցել գերության ընթացքում: Հնարավոր է, որ նրանք ապրել են այնպիսի պահեր, որոնց մասին  իրենք իրենց չեն ուզում խոստովանել:

Զրույցը՝ԻԼՈՆԱ ԱԶԱՐՅԱՆԻ