Օնիկ Գասպարյանը կրում է ամբողջական պատասխանատվություն պատերազմի նման ելքի համար. Գեներալ-լեյտենանտ Սամվել Բաբայանը ուշագրավ փակագծեր է բացում

«Իրավունքը» առիթ ունեցել է անդրադառնալու է համացանցում տարածված Շուշի պաշտպանության օպերացիայի մշակման տեսագրությանը: Հիշեցենք, ԱՀ ԱԽՔ նախկին քարտուղար, ռազմական, պետական և քաղաքական գործիչ, գեներալ-լեյտենանտ Սամվել Բաբայանի կողմից մշակվել եւ պետք է իրականացվեր օպերացիա, որի, իրագործումից, սակայն, գունդը, որին վստահված էր հակահարձակվողական օպերացիան, վերջին պահին հրաժարվել է:

Թե ո՞ւմ հրամանով եւ ի՞նչ պատճառաբանությամբ է հրաժարվել գունդը Շուշիի պաշտպանությունը իրականացնելուց` հարցերի պատասխանը, հույս ունենք, որ կտա քննությունը:

Հատկանշական է, սակայն, որ որոշ զինվորականներ, ինչպիսինն օրինակ գեներալ-գնդապետ Մովսես Հակոբյանն է, փոխարենը հետամուտ լինեն եւ անձամբ շահագրգռված լինեն նրանում, որ օր առաջ բացահայտվեն, մեղմ ասած, դավաճանները, արի ու տես քննարկում են հարցը, որ Սամվել Բաբայանն իրավասություններ չուներ նման օպերացիա իրականացնելու համար, ըստ այդմ էլ, նորմալ է, որ օպերացիան, ըստ էության չի իրականացվել:

Վերոնշյալի շուրջ «Իրավունքը» մեկ անգամ եւս փորձեց կապ հաստատել ԱՀ ԱԽՔ նախկին քարտուղար Սամվել Բաբայանի հետ:

- Պարոն Բաբայան, Շուշիի չիրականացված օպերացիայի շուրջ աղմուկը գնալով մեծանում է: Այնտեղ գտնվող շատ զինվորականներ փաստում են, որ եթե այդ օպերացիան իրականացվեր, այո, Շուշին հիմա գուցեւ մերը լիներ, այնուամենայնիվ, սակայն, գտնվեց նաեւ զինվորական, ինչպիսինն օրինակ գեներալ Մովսես Հակոբյանն է, ով փաստում է, որ ԱԽ քարտուղարը ի պաշտոնե իրավասու չէր նման իրավասություններով հանդես գար եւ նման օպերացիա իրականացնել: Ո՞վ էր Ձեզ լիազորել պարոն Բաբայան այդ օպերացիան իրականացնել` մանրամասնեք խնդրեմ:

-Նախ նման մարդիկ պետք է առաջինը պատասխան տան, իսկ,  թե ինչու են հիմա խոսում չեմ հասկանում, իրենք ընդհանրապես չպետք է խոսեն: Ինչ վերաբերում է նրան,  թե ես լիազորություն ունեի թե ոչ, ապա ես լիազորություններ ունեի Կամանդյուշիի կողմից, իսկ Կամանդյուշին իր Գլխավոր շտաբի հետ համաձայնեցնում է բնականաբար, ինքնուրույն չի անում: Դրա համար խորհուրդ կտայի գնային հենց այդտեղից ճշտեին: Եթե լիազորություն չունեինք, ապա  հրետանու պետը ու մնացած մարդիկ, ովքեր մասնակցել եւ առաջադրանքներ են ստացել, ապա ինչու պետք է ստանային այդ առաջադրանքը: Եթե դա Գլխավոր շտաբի հետ համաձայնեցրած չի եղել, ապա ո՞վ իրավունք ուներ դա անելու: Ամեն ինչ եղել է օրենքի շրջանակում, մնում էր հրամանը տալուն գործողությունը սկսելու համար: Բայց այդ գումարտակները չեն մասնակցել եւ վերջին պահին հրաժարվել են կատարել հրամանները:

Որովհետեւ ստանալով առաջադրանքները, ապա հասնելով զորքին արդեն իսկ զորքի մեջ եղել են մարդիկ, ովքեր խնդիրներ են առաջացրել, որ չգնան եւ մասնակցեն օպերացիային, պետք է դրանցով զբաղվել:

Հիմա քննություն է ընթանում, թող պարզեն, թե ինչու են այդ մարդիկ հրաժարվել որեւէ գործողություն կատարել, ով է հրաման տվել եւ այլն: Իսկ ես լիազորություն ունեցել եմ, թե ոչ` դա եւս կճշտվի քննությամբ, թող անհոգ լինեն:

- Պարոն Բաբայան,  ԳՇ այն ժամանակվա պետ Օնիկ Գասպարյանը կարո՞ղ էր չեղարկել այդ օպերացիան:

- Այո, բայց ես ինչքան գիտեմ Օնիկ Գասպարյանից դուրս չի եկել դա, այլ դուրս է եկել ավելի ցածրից: Բայց մինչ այդ օպերացիան այնտեղի գործող հրամանատարը Օնիկ Գասպարյանի հետ համաձայնեցնում է, առանց համաձայնեցնելու չեն անում:

- Ստացվում է, որ Օնիկ Գասպարյանը տեղյա՞կ է եղել, որ նման օպերացիա է իրականացվում:

- Իմ ներկայությամբ ոչ մեկը չի խոսել Օնիկ Գասպարյանի հետ, թե ինձանից հետո Միքայելը` այսօրվա ՊԲ հրամանատարը` ում հետ է համաձայնեցրել առհասարակ` չգիտեմ:

- Պարոն Բաբայան, ըստ Ձեզ Օնիկ Գասպարյանի պատասխանատվության չափը պատերազմի նման խայտառակ արդյունքի համար, որքա՞ն է:

- Օնիկ Գասպարյանն է կրում ամբողջական պատասխանատվություն պատերազմի նման ելքի համար: Ամբողջովին պատասխանատու է շտաբի պետը, այդ մասին անգամ իր զբաղեցրած պաշտոնն է ասում եւ դա ինքն էլ շատ լավ է հասկանում ու գիտակցում է:

Զրույցը` ԻԼՈՆԱ ԱԶԱՐՅԱՆԻ