«Իրենք ոչ նկարն են հաշվի առնում, ոչ չափսը, այսինքն իրենց ոնց ձեռք է տալիս ֆինանսապես` այդպես են առաջնորդվում, համենայնդեպս ես այդպես եմ հասկանում». ԱԼԲԵՐՏ ՀՈՎՀԱՆՆԻՍՅԱՆԻ Հայրիկի բացառիկ մեկնաբանությունը

«Իրենք կարող են մատչելի ապրել, բայց ոչ ազգի համար մարտիրոսված Տղերքի շնորհիվ»

Պատերազմը չսպիացող վերք է բացել մեր սրտերում, ցավ ու տրտունջ թողել: Մեր Լուսավոր Տղաները իրենց կյանքը նվիրաբերեցին Հայրենիքին և մեր հուշերում մնացին Հավերժի Հերոսներ…
Արդյո՞ք մենք կարողանում ենք ըստ արժանվույնս հատուցել մեր Հերոսների կատարած սխրանքներին եւ ապավեն կանգնել հերոսածին ծնողներին: Վերջին իրադարձությունները ցույց են տալիս, որ կարծես թե ոչ…

Խոսքը վերաբերում է մասնավորապես մեր Հերոս Տղաների համար նախատեսվող շիրմաքարերին, որոնք առնվազն հարիր չեն հայրենի հողի, հայ ազգի համար մարտիրոսված մր քաջորդիներին: Խնդրի մասին առաջինը ահազանգել է հայ ժողովրդի անպարտելի ոգու խորհրդանիշ դարձած, մերօրյա լեգենդ Ալբերտ Հովհաննիսյանի հայրիկը` ԱՐՏԱԿ ՀՈՎՀԱՆՆԻՍՅԱՆԸ, մասնավորապես գրելով. «Տղերքի շիրմաքարերը պետք է լինեն մեզանից բարձր և որակապես ամենալավը ։Ոչ թէ այս օրինակը ,որը մենք ծնողներս չենք ընդունում։Պահանջում ենք որպեսզի ՊՆ-ն վերանայի իր մոտեցումը և աչալուրջ լինի այդ գործին ։Քանի որ Տղերքը շատ ավելիին են արժանի»։

Ո՛չ նկարն են հաշվի առնում, ո՛չ չափսը, այսինքն իրենց ոնց ձեռք է տալիս ֆինաննսապես` այդպես են առաջնորդվում են:
Արդյո՞ք Հերոսի հայրիկի եւ մեր Հերոս Տղաների հարազատների բարձրացրած արդարացի խնդրին եւ մտահոգությանը որեւէ կերպ հետամուտ են եղել պատկան կառույցները` այս դեպքում Պաշտպանության նախարարությունը NewsMedia.am-ը փորձեց հետաքրքրվել 44-օրյա պատերազմի խորհդանիշ դարձած ՀԵՐՈՍ ԱԼԲԵՐՏ ՀՈՎՀԱՆՆԻՍՅԱՆԻ հայրիկից` ԱՐՏԱԿ ՀՈՎՀԱՆՆԻՍՅԱՆԻՑ, ով նախ նկատեց.

-Անձամբ ինձ հետ որեւէ մեկը կապի դուրս չի եկել, բայց երեկ օրվա ընթացքում մի քանի տարբեր տեսականի են բերել եւ դրել Եռաբլուրի մուտքի մոտ, որի նկարները ինձ ուղարկել են, որոնց հետ ես համաձայն չեմ: Պարզապես այնտեղ կար մի հատ սեւ քար, որի գոնե չափսերը համապատասխանում էր այն չափսերին, որը անհրաժեշտ է, բայց քարի որակը չեմ տեսել: Ես նորից եմ կրկնում. մենք պարտավոր ենք ճիշտ արժեւորել մեր Տղաներին, այլ թեմա չի կարող լինել:

-Այսինքն Ձեր գրառումը անհետեւանք չի՞ մնացել:

-Իմ գրառումից հետո են Եռաբլուրի մուտքի մոտ տեղադրվել նմուշները: Չեմ կարող ասել դա իմ գրառման հետեւանքն է, արձագանքն է, թե պարզապես համըկնում էր` չեմ կարող ասել:

-Այսինքն բերել դրել են Եռաբլուրի մուտքի մոտ, որպեսզի ծնողները իրենց հավանությունը տան այդ նմուշներից որեւէ մեկի՞ն:

-Այ՛ո:

-Նախորդի մասի՞ն էլ էիք այդպես տեղեկացել:

-Այ՛ո, բայց այնտեղ որեւէ մեկս չենք հասկանում. դա նրանք բերել էին, որպես օրինակ ցուցադրելո՞ւ, թե՞ որ մեր աչքը սովորի, որ Տղաների շիրմաքարերը այդպիսին պետք է լինեն:
Տղերքի քարը պետք է մեզանից բարձ ու մեծ լինի: Այսօր մարտիրոսված Տղերքն են մեծությունը, եթե ինչ-որ մեկը կարող է համարել, որ այսօր ապրողներից որեւէ մեկը Տղերքից առավել մեծություն է, ուրեմն ուղղակի խոսքեր չեմ գտնում: Մարտիրոսված Տղերքից այն կողմ մեծություն այսօր չպիտի լինի:

-Պարոն Հովհաննիսյան, հետաքրքիր է` ՊՆ-ն մինչ նման որոշում կայացնելը խորհդակցել է՞ ծնողների հետ:

-Ես տեղյակ չեմ, ես չեմ եղել, ըստ այդմ չեմ կարող ասել: Իրենք ասում են, որ եղել է, բայց եթե իրենք համարում են 10-20 հոգու հետ հանդիպելը հարցի լուծում է` թող այդպես լինի, ինչ ասեմ: Ինքս անձամբ տեղյակ չեմ եղել, իմ համաձայնությունը չեմ տվել, ու հավանություն չեմ տալու մինչ այն պահը, որ հասկանամ իրոք տեղադրվում է Հերոսներին վայել շիրմաքար:
Ես էլի եմ ասում. ես երբեւէ չեմ փորձել առանձնացնել իմ որդուն, բայց այս իրավիճակը, որ իրենք են ստեղծում, ես այլ ելք չեմ տեսնում: Իրենք ոչ նկարն են հաշվի առնում, ոչ չափսը, այսինքն իրենց ոնց ձեռք է տալիս ֆինանսապես` այդպես են առաջնորդվում, համենայնդեպս ես այդպես եմ հասկանում: Այլ խոսքով` մատչելի իրենց համար, իրենք կարող են մատչելի ապրել, բայց ոչ ազգի համար մարտիրոսված Տղերքի շնորհիվ:

-Ի դեպ, պարոն Հովհաննիսյան, օգտվելով, առիթից կցանկանայինք տեղեկանալ նաեւ, թե ե՞րբ ենք ունենալու ՀԵՐՈՍ ԱԼԲԵՐՏ ՀՈՎՀԱՆՆԻՍՅԱՆԻ տուն-թանգարանը, որի մասին Դուք խոսել եք դեռեւս տարեսկզբին:

-Դա կլինի հաջորդ տարի, ես իմ ուժերով ինչքան կկարողանամ կանեմ: Ես որեւէ պետական աջակցություն չեմ ուզում, որեւէ պետական միջոցառման էլ չեմ մասնակցելու: Անգամ իրենք հուշակոթող են ուզում անել, բայց ես չեմ թողնելու իմ որդուն իրենք այդտեղ ներառեն: Ես ընդհանրապես չունեմ որեւէ մեկի հետ ոչինչ քննարկելու կամ խոսելու բան: Կրկնում եմ. իմ ուժերով ինչքան կկարողանամ` այդքանը կանեմ:

ՆՈՆԱ  ԱԴԱՄՅԱՆ 

NewsMedia.am 

Լուրեր   Հայաստանից եը Աշխարհից