Դուք դավաճանեցիք Տղաներին ռազմի դաշտում, բայց Տղաները կյանքի գնով պայքարեցին. մի լուսավոր շիրիմն ինչ է Տղաների արածի դիմաց, որ դա էլ չեք ուզում նորմալ տեղադրել

Սիսիանի համայնքապետարանն այս օրերին քաղաքային պանթեոնում նորոգման ու բարեկարգման աշխատանքներ է սկսել: Տարածքը մեծացնում են, էլեկտրական լուսավորություն, ոռոգման ջուր են անցկացնում: Ինչպես տեղեկացանք համայնքապետարանից, նպատակ ունեն մինչեւ սեպտեմբերի 27-ն աշխատանքներն ավարտել։ Եթե հասցնեն, վերջին պատերազմի զոհերի միանման լուսանկարներն էլ են տեղադրելու, ավելի ուշ՝ շիրմաքարերը:

Նկատենք, որ 44-օրյա պատերազմում զոհված 66 հերոս տղաներ ենհուղարկավորված Սիսիանի պանթեոնում:  Եվ ահա մեզ հասած տեղեկությունների համաձայն, 44-օրյա պատերազմի զոհերի մի խումբ ծնողներ համաձայն չեն համայնքապետարանի առաջարկած շիրմաքարերի եւ շիրմաքարին կից դրվող լուսանկարների ձեւին: Նշենք, որ Սիսիանի քաղաքային պանթեոնում հիմնադրման ժամանակվանից՝ 1992-ից սկսած, դրվում են միանման շիրմաքարեր՝ նույն ոճի սեւ-սպիտակ լուսանկարներով: Փոքրիկ, քարե սալիկի վրա դաջված լուսանկարները:

«Մեր ուզածն այնքան քիչ բան է: Գորշ, բազալտե քարեր չենք ուզում, դրանք մամռակալում են, իսկ լուսանկարները անձրեւի, ձյան օրերին թրջվում են, չեն երեւում: Արդեն տեսնում ենք, որ Արցախյան առաջին պատերազմի շատ զոհերի շիրիմներ ինչ վատ վիճակում են: Մենք արդեն մեր ամենաթանկն ենք կորցրել, ինչ էլ անենք, հետ չենք բերելու, բայց նրանց հիշատակի համար մի բան անենք, թեկուզ մեր ուժերով»,-փաստում են հերոսների ծնողները:

Համայնքապետարանը, դեռ որեւէ հստակ պատասխան չի տվել՝ արդյո՞ք հաշվի կառնվեն հերոսածին ծնողների խնդրանքը: Այն ինչ պարտավոր են հաշվի նստել հերոսների ծնողների ցանկացած ցանկության հետ, այն հերոս տղաների, որոնց, թեեւ ռազմի դաշտում մենակ էին թողել, դավաճանել, բայց տղաները չփախան, մարտնչեցին՝ զոհասեղանին դնելով իրենց կյանքը:

Հույս ունենք, որ Սիսիանի համայնքապետարանը կարձագանքի մեր հրապարակմանը եւ հերոսների ծնողների այդ աննշան, բայց իրենց համար, սփոփիչ ցանկությունը՝ կիրականացնեն:

Իսկ, մինչ այդ նորից ու նորից կներեք մեզ տղաներ, որ արժանի չեղանք Ձեր սխրանքներին, Ձեր՝ մեզ շնորհած կյանքին:

ԻԼՈՆԱ ԱԶԱՐՅԱՆ

Iravunk.com