Ալլահշուքյուր Փաշազադեի արձագանքը այն չէր, ինչ մենք ակնկալում էինք. Արցախի թեմի առաջնորդը փակագծեր է բացում Մոսկովյան հանդիպումից

«Արցախցուն այսօր մտահոգող միակ ու ամենակարեւոր խնդիրը մեկն է, որն է լինելու Արցախի ապագնան, երբ է Արցախին կարգավիճակ տրվելու: Արցախցու վաղվա օրը կախված է բանակցային գործընթացներից: Եթե մեր պետական այրերը ճիշտ քաղաքականություն չվարեն վաղ թե ուշ մենք կորցնելու ենք Արցախը, որովհետեւ չես կարող մարդուն փակ վարագույրի տակ անընդհատ պահել: Ես Ձեզ ավելին ասեմ, եթե Արցախում ՌԴ խաղաղապահները չլինեին, ապա հայերին այստեղ չէին թողնի մնալ: Ոչ թե հայը չի ցանկանա մնալ, այլ պարզապես չեն թողնի Արցախը առանց խաղաղապահների»,- «Իրավունքի» հետ զրույցում անդրադառնալով պատերազմից մեկ տարի անց Արցախում առկա իրավիճակին, ասաց Արցախի Թեմի Առաջնորդ Վրթանես եպիսկոպոս Աբրահամյանը, ընդգծելով.

-Բայց սա դեռ ոչինչ չի նշանակում, Արցախին կարգավիճակ է պետք, եթե կարգավիճակ չտրվի, ապա Արցախը կդատարկվի: Ցանկացած արտաքին քաղաքական ձախողում նպաստելու Արցախի հայաթափմանը:

-Սրբազան, կմնանրամասնե՞ք  Մոսկվա կատարած այցի մանրամասները:

-Հայաստանի Վեհափառի ու Մոսկվայի և Համայն Ռուսիո Կիրիլ պատրիարքի միջև եկեղեցիների առնչությամբ տարբեր քննարկումներ եղել են, այդ թվում՝ Դադիվանքի։ Պատրիարքին ենք ներկայացրել  խնդիրը, Վեհափառ հայրապետի կողմից բարձրացրած խնդիրների մեջ էլ է այդ հարցը շոշափվել։ Անշուշտ, միանգամից մենք պատասխան չենք ակնկալում։  Կովկասի մահմեդականների վարչության ղեկավար և Ադրբեջանի հոգևոր առաջնորդ Ալլահշուքյուր Փաշազադեի հետ հանդիպմանը նույնպես խնդրի մասին բարձրաձայնվել է, խոսվել է նաեւ գերիների վերադարձի խնդրի մասին։ Դե այնտեղ պատասխաններ չեն հնչում, կարծիքներ են հնչում, և որ հարցերում դժվարություններ են լինում, անդրադառնում են, սակայն դժվարանում են պատասխաններ տալ։ Ամեն դեպքում, իրենց ասել ենք, որպեսզի հնարավորություն ընձեռվի անխափան մեր ուխտավորներն այցելեն հայկական պատմամշակութային վանքեր ու եկեղեցիներ։ Այսինքն՝ նման հանդիպումների ժամանակ հարց ու պատասխան չէ, որ հարցը բարձրացնես, իրենք ասեն՝ այո կամ ոչ։ Հարցը բարձրացվում է, որը հետագայում կդրվի քննարկման:

-Սրբազան, իսկ Ադրբեջանի հոգևոր առաջնորդ Ալլահշուքյուր Փաշազադեի մոտ պատրաստակամություն նկատեցի՞ք:

-Ադրբեջանի հոգևոր առաջնորդ Ալլահշուքյուր Փաշազադեի արձագանքը այն չէր, ինչ մենք ակնկալում էինք: Ինքը ասում էր այն ինչը նրան ասել էին, թույլ էին տվել ասել: Ամեն դեպքում ինքը ամեն բան լսեց, կարելի է ասել կառուցողական մթնոլորտում ավարտվեց հանդիպումը:

Զրույցը` ԻԼՈՆԱ ԱԶԱՐՅԱՆԻ

Iravunk.com