Ունեզրկում և օրենքով բոմժ են դարձնում.Հայտնի փաստաբանը մանրամասներ է ներկայացնում աստղահոգեբան Լյուսյա Հակոբյանի գործից

«Հայաստանի անկախացումից հետո տասնյակ հազարներով մարդիկ ունեզրկվում եւ դատական ակտով դառնում օրենքով բոմժեր: Նման իրավիճակում է հայտնվել նաեւ հայտնի աստղահոգեբան Լյուսյա Հակոբյանը»,-այս մասին «Իրավունք TV»-ի եթերում ասել է հայտնի փաստաբան, «Լեւ Գրուպ» փաստաբանական ընկերության հիմնադիր-ղեկավար Լեւոն Բաղդասարյանը , ով այսուհետ ներկայացնելու է նաեւ Լյուսյա Հակոբյանի եւ նրա ընտանիքի շահերը:

Փաստաբանի խոսքերով.

- Լյուսյա Հակոբյանը տարիներ առաջ վերցրել է գումար, ինչ-ինչ պատճառներով, գումարը վերցնելիս գործարքը վավերացվել է նոտարական կարգով, որտեղ երեւում է, որ գումարը տրվում է անտոկոս: Թե ինչ ներքին պայմանավորվածություն են ունեցել իրականում, դա այլ խնդիր է: Բայց դրանից հետո Լյուսյան եւ իր ընտանիքի անդամները տեւական ժամանակ վճարումները բարեխղճորեն կատարել են, թե ինչու դա գրավոր չի փաստվում եւս այլ խնդիր է, բայց, որ անձը վճարել է եւ իր պարտավորությունները կատարել է թեկուզ մասմնակի` հանրահայտ փաստ է: Դրանից հետո պարտատերը մտնում է դատարան եւ ստանում դատական ակտ: Այնքանով, որքանով, որ գումար վերցնելիս, որպես երաշխիք գրավադրվել է տիկին Լյուսյաի եւ իր ընտանիքի միակ բնակարանը փոխանցվում է, որպես պարտատիրոջ ունեցվածք: Ընդգծեմ, որ տիկին Լյուսյաի բնակարանը գտնվում է քաղաքի փոքր կենտրոնում, որի մինիմալ արժեք գնահատվում է 150-200 միլիոն,  վաճառվում է ընդամենը 30 միլիոն դրամով, եւ վաճառվում սնանկության վարույթում գտնվող կառավարչի կողմից: Այ այստեղ է, որ իրավունքի տոտալ խախտումը ակնհայտ է, որովհետեւ չէր կարող երեք-չորս հարյուր հազար դոլարանոց տունը վաճառվեր ընդամենը 60 հազար դոլարով: Արդյունքում պատկերացրեք տվյալ անձանց հոգեկան վիճակը, երբ տարիներ շարունակ իրենց ձեռքերով սարքած միակ օջախը` մի քանի ամիսների ընթացքում ոչ միայն կորցնում են, այլ նաեւ մի հատ էլ պարզվում է, որ  նաեւ հնարավոր դեռ պարտք մնացած լինեն պարտատիրոջը: Դա անթույլատրելի է: Այստեղ պետք է առաջին հերթին տրվի իրավական գնահատական, թե որն է պատճառը, որ գումարը տրվել է տոկոսով, իսկ լոկալ իրավական պայմանագրում այն չի ֆիքսվել: Երկրորդը,  պետական  լիազոր մարմինները հանցակազմ պետք է տեսնի, թե որն է եղել պատճառը, որ քաղաքի փոքր կենտրոնում գտնվող անշարժ գույքը վաճառվել մի քանի անգամ ցածր գնով: Հետամուտ եմ լինելու, որպեսզի տիկին Լյուսյաի խախտված իրավունքները վերականգնվեն:

-Այսինքն դիմելու եք դատական պաշտանությա՞ն:

-Լինելու է եւ քաղաքացիական եւ իրավական հարթության վրա: Քաղաքացիական դաշտում մտնելու ենք դատարան, որպեսզի օրենք ուժով անվավեր ճանաչվի կառավարիչի կողմից հայտարարված աճուրդը: Հայցի հիմքում դնելու ենք այն հանգամանքը, որ անշարժ գույքը ակնհայտ ցածր գնով է վաճառվել:Դիմելու ենք նաեւ պետական լիազոր մարմիններին, որպեսզի տրվի այս գործարքների քրեաիրավական գնահատականը:

Հ.Գ. Մանրամասները դիտեք

«Իրավունք TV»-ի ամբողջական տեսանյութում:

Զրույցը` ԻԼՈՆԱ ԱԶԱՐՅԱՆԻ