Պեսկովը Ռուսաստանի համար ՆԱՏՕ-ի կողմից անվտանգության երաշխիքների թեման «կյանքի ու մահվան հարց» է անվանել

Ռուսաստանի անվտանգությունը վտանգի տակ է՝ դեպի արեւելք ՆԱՏՕ-ի առաջխաղացման վերաբերյալ Արեւմուտքի շարունակական խաբեության պատճառով, Մոսկվայի համար անվտանգության երաշխիքներ ստանալն այժմ դարձել է կյանքի ու մահվան հարց: Այս մասին «Ռոսիա-1» հեռուստաալիքի եթերում «Մոսկվա, Կրեմլ, Պուտին» հաղորդմանը տված հարցազրույցում ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով լրագրող Վլադիմիր Սոլովյովի հարցերին, հայտնում է ՏԱՍՍ-ը։

«Սա արդեն խնդիր է մեզ համար, դե, փաստացի կյանքի ու մահվան հարց»,- հավելել է նա:

Կրեմլի ներկայացուցիչը խոստովանել է, որ Պուտինը դեկտեմբերի 23-ի մամուլի ասուլիսում «իրոք զգացմունքային» է խոսել երաշխիքների մասին։ «Բայց ամեն անգամ, երբ նախագահը խոսում է երկրի ազգային շահերի, երկրի անվտանգության մասին, նա միշտ զգացմունքային է, ինչը, սակայն, նրա ձեւակերպումները պակաս սպառիչ չի դարձնում»,- հավելել է նա։

Մեկնաբանելով հեռուստահաղորդավարի նկատառումը՝ Պեսկովը հիշեցրել է, որ երաշխիքների հարցի բարձրացումը նախագահի նախաձեռնությունն է, «ով իրավիճակը համակողմանիորեն վերլուծելու հնարավորություն ունի», այլ ոչ թե պատասխան ամերիկացիների հնարավոր հարցին, թե ինչն է անհանգստացնում Մոսկվային։

«Ոչ, ամերիկացիներն այդպես չեն ասում, ամերիկացիներն անում են: Մենք տեսնում ենք, թե ինչ է անում ՆԱՏՕ-ն, տեսնում ենք զորավարժություններ մեր սահմաններին, տեսնում ենք հսկայական քանակությամբ տեխնիկայի մատակարարում։ Նրանք Հունաստանով են բերում, նաեւ այլ ուղղություններով։ Այս տեխնիկան սկսում է ներթափանցել Ուկրաինայի տարածք, այնտեղ սկսում են գալ ռազմական հրահանգիչներ, ինչպիսիք արդեն մի քանի հազար կան։ Աստիճանաբար ՆԱՏՕ-ն ներթափանցում է Ուկրաինայի տարածք, եւ այնուհետեւ փաստացի կմնա միայն այս գործընթացի պաշտոնականացումը»,- ասել է Պեսկովը։