1 Հունվար, 2022

Մաղթում եմ, որ եկող տարիներին Ամանորն ու Սուրբ Ծնունդը կարողանանք նշել մեր Շուշիում ու Հադրութում. Մարգարիտա Խաչատրյան

«Զինվոր» համակարգող խորհրդի նախագահ ՄԱՐԳԱՐԻՏԱ ԽԱՉԱՏՐՅԱՆԸ Ամանորի ուղերձ է հղել, որում մասնավորապես ասված է.

«Սիրելի՛ հայրենակիցներ,

Սահմանին կանգնած զինծառայողներ, հանուն հայրենիքի զոհված քաջորդիների փառապանծ մայրեր, զինվորներ ու սպաներ, հաշմանդամ դարձած զինծառայողներ, ավարտին է մոտենում 2021 թվականը։ Անցած տարիները մեր ազգի համար եղան չափազանց ծանր՝ կորուստների ու ցավի ժամանակաշրջան։ Պատերազմից հետո թշնամին շարունակում է ոտնձգել մեր սահմանի ուղղությամբ, տարածքային պահանջներ ու վերջնագրեր է ներկայացնում։ Այս ամենին պետք է վերջ տալ։ Թող եկող՝ 2022 թվականը մեր ազգի համար լինի մեջքն ուղղելու եւ հզորանալու դարաշրջանի մեկնարկ։

Սիրելի՛ հայրենակիցներ, այս բարդ ժամանակաշրջանում մենք պետք է լինենք միասնական, կատարելագործվենք ու հզորանանք։ Սիրելի՛ մայրեր, շարունակեք ձեր աստվածատուր առաքելությունը՝ զավակներ ունեցեք, դաստիարակեք նրանց որպես հայ ազգի անպարտ որդիներ։ Շնորհավորում եմ բոլորին՝ հայ սպային ու զինվորին, որդեկորույս մայրերին ու սահման պահող զինվորների ծնողներին, հարազատներին, հաշմանդամ դարձած զինծառայողներին:

Թող գալիք՝ 2022 թվականը լինի մեր երկրի համար շրջադարձային։ Մենք պարտավոր ենք շենացնել մեր երկիրը եւ պարտավոր ենք առաջին հերթին այն հազարավոր տղերքի համար, որոնք առանց վայրկյան անգամ մտածելու կռվեցին հանուն հայրենիքի ու անմահացան։

Եվս մեկ անգամ շնորհավորում եմ եւ մաղթում, որ եկող տարիներին Ամանորն ու Սուրբ Ծնունդը կարողանանք նշել մեր Շուշիում ու Հադրութում, աղոթենք մեր Դադիվանքում, մեր Ղազանչեցոցում։ Ես հավատում եմ՝ գալու է այդ օրը։

Շնորհավոր Ամանոր և Սուրբ Ծնունդ»։