Եթե էս հարցում էլ հետնահանջ անենք, ուրեմն՝ կարանք ազգովի թոկը գցենք վզներս պրծնենք․ Արսեն Ղուկասյանը փակագծեր է բացում

Պատերազմում զոհված զինծառայողների դիերն և մասունքները նկուղի հատակին նետելու համար ոչ ոք պատասխանատվության չի ենթարկվի։ Քննչական կոմիտեն որոշել է, որ զինվորների մարմինները նկուղում պահելը նորմալ է ու քրեական գործի վարույթը կարճել։ 

Դատապարտելի այս երեւույթի՝ նահատակված հայորդիների մասունքները և դիերը Աբովյանի դիահերձարանի նկուղում պահվելու մասին լայն հասարակությանը հայտնի դարձավ 2021 թվականի դեկտեմբերի 31-ին, հարազատները տարածեցին նաեւ սահմռկեցուցիչ տեսարանը պատկերող կադրերը՝ մարմինները պոլիէթիլենային տոպրակներով՝ գետնին նետված վիճակում։ ՀՀ առողջապահության նախարարությունը հաստատել էր տեղեկությունը՝ նշելով, թե, իբր, մասունքներն անցել են համապատասխան նույնականացում և սպասում են, որ հարազատները վերցնեն' հուղարկավորելու համար։ Բարձրացված մեծ աղմուկը մեղմելու համար թերեւս երկու օր անց՝ ՀՀ առողջապահության նախարարությունից հայտնեցին, թե դատաբժշկական գիտագործնական կենտրոնի Աբովյանի մասնաճյուղի վարիչն ու 2 աշխատակից ազատվել են աշխատանքից։ Ապա հայտարարվեց նաեւ քրեական գործ հարուցվելու մասին՝ ՀՀ քրեական օրենսգրքի 308-րդ հոդվածի 1-ին մասով՝ պաշտոնեական լիազորությունները չարաշահելու հատկանիշներով։ Հիմա արդեն ակնհայտ է, որ քրգործի հարուցումն ընդամենը նպատակ էր հետապնդում մեղմել հասարակական դժգոհությունը ու ոչ թե զազրեցի երեւույթի պատասխանատուների գործողություններին համարժեք քրեաիրավական գնահատական տալը։ Դեկտեմբերի 16-ին որոշում է կայացվել քրեական հետապնդում չիրականացնելու և քրեական գործի վարույթը կարճելու մասին՝ ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետով՝ հանցակազմի բացակայության հիմքով։

Միաժամանակ ՔԿ-ից նշել են, որ քրեական գործի նախաքննության ընթացքում ՀՀ առողջապահության նախարար Անահիտ Ավանեսյանը չի հարցաքննվել։

Վերը նշվածի վերաբերյալ <<Իրավունքը>> զրուցել է վերը նշված պարսավելի սրբապղծությունը բացահայտած գերիների եւ անհետ կորած տղաների խնդիրները բարձրաձայնող Արսեն Ղուկասյանի հետ, ով վրդովված ներկայացրեց հետեւյալը․

-Այդ գործով զբաղվող մեր փաստաբանը նոր է ստացել որոշումը, մանրամասն ծանոթանալուց հետո անպայման մինչեւ վերջ բողոքելու ենք։ Աբովյանի մորգում տեղի ունեցած սրբապղծության բացահայտման համար դա խազ գնալու ենք, մեղավորները պետք հատ հատ պատասխան տան, էս հարցում հետնահանջի տեղ չունեն իրավապահները։ Ասում են հանցակազմի բացակայության պատճառով ենք գործը կարճել, այն դեպքում, երբ ակնհայտ են բոլոր փաստերը, հանցակազմը ֆակտ երեւում է, բայց արի ու տես սրանք լոլոներ են կարդում։ Ես ասում եմ, որ եթե էս հարցում էլ հետնահանջ անենք, ուրեմն կարանք ազգովի թոկը գցենք վզներս պրծնենք։

ԻԼՈՆԱ ԱԶԱՐՅԱՆ

Iravunk.com