«Ազգային եկեղեցի, Ազգային Բանակ.այս երկու կարեւոր սրբազան կառույցներն են,որոնք անհրաժեշտ են պետականության պահպանման համար».Արցախի Թեմի Առաջնորդ

«Ես այն երջանիկներից եմ, ով ականատեսն է եղել Հայոց բանակի սկզբնավորումը: Տեսել եմ Հայոց բնակի հաղթանակները, փոքր-ինչ բաթողումները, ըստ էության կարող եմ փաստել, որ եղել եմ ականատեսը Հայոց բանակի կայացման, զարգացման` ֆիդայական շարժումից մինչեւ մեր օրերը: Տեսել եմ, թե մեր զինվորները, մեր բանակը, որպես մեր ազգի, պետականության, ժողովրդի անվտանգության երաշխավոր ինչ ապրումների միջով են անցել: Եվ պատահական չէ, որ մենք, որպես ազգ, որպես պետություն, զգացել ենք բանակի ջերմությունը, ուժն ու թիկունքը»,-Newsmedia.am-ի հետ զրույցում անդրադառնալով Հայոց բանակի 30-ամյակին, ասել է Արցախի թեմը առաջնորդ Վրթանես եպիսկոպոս Աբրահամյանը, ընդգծելով.

-Բանակը մեզ համար դարձել է համահունչ ազգային եկեղեցուն: Ազգային եկեղեցի, ազգային բանակ, այս երկու կարեւոր անվտանգային, սրբազան կառույցներն են, որոնք անհրաժեշտ են պետականության պահպանման համար: Եվ այս պարագայում անընդունելի եմ համարում   այս երկու կառույցները դարձնել խոցելի:

Խոսելով բանակի ներկա վիճակի մասին Սրբազան հայրը արձանագրում է.

-Այսօրվա բանակը կրկին վերակազմավորվում է, եւ ես կարծում եմ, որ այն տղաները, ովքեր իրենց սրտում եւ մտքում ունեն հայրենիքը անվտանգ պահելու մղումը` կշարունակեն նույն հոգատարությամբ լցվել բանակի հզորացմանը:

Վերջում ուզում եմ ասել, սպանե՛ր Հայոց բանակի. թող Ձեր գոտիները միշտ ձիգ լինեն, որովհետեւ հայ զինվորին հարիր չէ կախված գոտի: Ձիգ գոտիներով, անսասան շարունակեք ծառայել Հայոց բանակին, որն այսօր առավել քան երբեւէ ունի բոլորիս կարիքը:

Ես մաղթում եմ, որ մեր Հայոց բանակը դառնա այն նույն բանակը, որի մասին ժամանակին խոսում էինք եւ այն բացթողումները, որոնք ունեցել է մեր բանակը թող իսպառ վերանան: Թող Աստված օրհնի Հայոց բանակը:

NEWSMEDIA.am 

Լուրեր Հայաստանից եւ Արցախից