Ալբերտն իր կերպարով` իր օրինակն է առաջարկում անմնացորդ նվիրումի ճանապարհով ամրացնելու հայրենիքի և պետականության հիմքերը.ԱՀ ՄԻՊ

«Երևի թե յուրաքանչյուր պատերազմի ժամանակ ինքնաբերաբար ի հայտ են գալիս կերպարներ, որոնք լավագույնս են ներկայացնում պատերազմական օրերին ողջ ազգի ապրումները, դիմակայելու վճռականությունն ու պարզապես այն, ինչին ձգտում և ինչի համար պատերազմում է այդ ժողովուրդը։ Արցախյան 44-օրյա պատերազմի այդ էտալոնային կերպարը հենց Ալբերտի կերպարն էր, որ բոլորիս՝ այդ թվում ինձ համար առավել ճանաչելի է դարձել հայտնի լուսանկարով»,-անդրադառնալով «Արցախի հերոս» Ալբերտ Հովհաննիսյանի կերպարին, այսպես սկսեց խոսքը Արցախի հանրապետության Մարդու Իրավունքների պաշտպան ԳԵՂԱՄ ՍՏԵՓԱՆՅԱՆԸ, ընդգծելով.

-«Արցախի հերոս» Աշոտ Բեկորը ճշմարտագույն կերպով նկարագրել է մեր ապրելու բանաձևը՝ ասելով, որ ամեն մի հայ պետք է զգա, որ առանց իրեն հայրենիքը կփլվի։ Լուսանկարից մեզ նայող Ալբերտի կերպարը հենց այս խոսքերի մարմնավորումն է, նա իր օրինակն է առաջարկում հայրենիքը պինդ պահելու և անձնազոհության, անհատական պատասխանատվության ու անմնացորդ նվիրումի ճանապարհով ամրացնելու հայրենիքի և պետականության հիմքերը։ Կան լուսանկարներ, որ հաճախ ուղղակի բացում ու նայում ես, որոնք ուժ են փոխանցում շարունակելու պայքարը, և ոչ թե կամ ոչ միայն լուսանկարներում պատկերված մարդկանց անձնազոհության համար, այլ որովհետև այդ կերպարները իրենց մեջ բյուրեղացնում են պայքարի ոգին, պատմում ու պահանջում են որևէ պարագայում թույլ չգտնվել, չհուսահատվել։

Ամփոփելով խոսքը ԱՀ ՄԻՊ-ը փաստում է.

-Այսօր մեզ՝ մանավանդ Արցախում ապրողներիս, ամենաշատը հենց դա է անհրաժեշտ, ոչ մի վայրկյան չմտածել ընկրկելու մասին ու հույսով շարունակել պայքարը՝ Ալբերտի և մյուս մարտիրոսված քաջորդիների գործը հանկարծ ու հանկարծ կիսատ չթողնելու և Արցախը հայկական պահելու համար։

ԻԼՈՆԱ ԱԶԱՐՅԱՆ

Iravunk.com