«Արմենակիցս հետո ես էլ չեմ ապրում, շնչում եմ, քայլում եմ, բայց չեմ ապրում»․ Քառօրյա պատերազմից 6 տարի անց․ Արցախի Հերոս Արմենակ Ուրֆանյանի մայրիկի հիշողությունները ու չսպաիցող վերքը

«Արմենակիցս հետո ես էլ չեմ ապրում, շնչում եմ, քայլում եմ, բայց չեմ ապրում, իմ հոգին Արմենակի հետ մահացավ»,-Newsmedia.am-ի հետ զրույցում վերհիշելով Հերոս որդուն, Արցախի Հերոս Արմենակ Ուրֆանյանին, ասաց Հերոսածին մայրը ՀԱՄԵՍՏ ՈՒՐՖԱՆՅԱՆԸ, ում ցավը անչափելի է, իսկ արտասուքը չչորացող…

Հերոսածին մայրը մեզ հետ խոսելիս անընդհատ արտասվում էր․

-Կոկորդս խեղդում է կարոտը, Արմենակիս մասին խոսել անցյալով՝ ինձ համար մահվանը հավասար դժոխք է։

Հերոս որդու մասին հիշողությունները սակայն, Հերոսածին մայրիկի մոտ ժպիտ են առաջացնում․

-Արմենակս շատ ակտիվ էր, բայց միեւնույն ժամանակ լսող: Դեռ դպրոց չէին գնում, տեղափոխվեցինք Ռուսաստան, մի քիչ մնացինք, բայց ամեն ամառ երեխաներին Հայաստան էի բերում տատիկի մոտ: Զգում էի, որ Ռուսաստանին դժվարությամբ են հարմարվում, Հայրենիքը ձգում էր: Մի պահ նորից վերադարձանք Հայաստան, կարճ ժամանակ դպրոց գնաց այստեղ, բայց հետո էլի տեղափոխվեցինք Ռուսաստան: Դե հայ ենք, երեխաներ են, անընդհատ հեռուստացույցով տեսնում էին, լսում պատերազմի մասին, հարցեր էին տալիս. մեկ-մեկ էլ պառկում էինք իրար հետ՝ ես ու երկու եղբայր, սկսում էի պատմել արցախյան դեպքերի մասին, նրանց այդ պատմությունները հետաքրքիր էին։ Վազգեն Սարգսյանով էր միշտ հիանում՝ որպես իսկական հայի կերպար:
Հերոսածին մայրիկի համար որդու հետ քայլելը, նույնիսկ հյուր գնալն էր հպարտություն. հիմա ուզում է առաջ նայել, բայց վախենում է ժամանակի հետ խորացող կարոտից ու դատարկությունից:

Նկատենք, որ Արմենակ Ուրֆանյանը Քառօրյա պատերազմի մեր այն քաջարի մարտիկներից է, ում գործած բացառիկ սխրանքը, անձնվեր ու անձնազոհ սպայի հերոսական կերպարը՝ հանրության շրջանում միանգամից դարձավ աննկուն կամքի ու նվիրումի օրինակ եւ խորհրդանիշ: Իր խիզախ, արիասիրտ զինվորների հետ հակառակորդի լայնածավալ հարձակումները ետ մղած, թշնամուն զգալի նյութական ու մարդկային կորուստ պատճառած և իր կյանքի գնով մարտական դիրքը պահած հրամանատարը՝ որպես Հերոս Սպա, ապրում եւ շարունակելու է ապրել Հայի որտում:

Հ․Գ․ Արմենակ Ուրֆանյան, Ռոբերտ Աբաջյան, Անդրանիկ Զոհրաբյան եւ Քյարամ Սլոյան. Հերոսներ, ովքեր կյանքի գնով պաշտպանեցին իրենց վստահված դիրքը՝ ընկերոջ կյանքը գերադասելով սեփականից. ԱՆՈՒՆՆԵՐ, որոնք հավերժ կապված կլինեն իրար:

Պատրաստեց՝ՆՈՆԱ ԱԴԱՄՅԱՆԸ

NewsMedia.am 

Լուրեր Հայաստանից եւ Աշխարհից