Մենք 30 տարի տեսել, այսօր էլ ամեն օր շարունակում ենք տեսնել կուսակցականների գերակշիռ մասի հնդուհավային կեցվածքներն ու լսում ենք նրանց անգրագետ, անկապ բլթոցները.պահանջվում է վերանայել ընտրական օրենքը

Այո, Ալավերդուց ԳԱԳԻԿ ՇՈԼԻՆՅԱՆԸ շատ ճիշտ է ահազանգում, որ անկուսակցական քաղաքացին զրկվում է ինքնաառաջադրման իրավունքից։ Այնինչ հազարավոր կիրթ, գրագետ, կարող ուժեր կան, թե երիտասարդ, թե՛ միջին ու հասուն տարիքի, ովքեր չեն ցանկանում որևէ կուսակցության անդամ դառնալ, քանի որ գտնում են, որ հատկապես Հայաստանյան կուսակցությունները գրպանային են, այսօր կան, վաղը չկան, առաջնորդվում են միայն իրենց նեղ կուսակցական-անձնական շահերով ու այդ կուսակցություններն են հենց Հայաստանը հասցրել այս ողբերգական օրվան։
Իսկ չկուսակցականացվող մարդիկ վեր են կանգնած նման շահերից, նրանց նպատակը մեկն է՝ Հայրենիքի բարգավաճումը, ու տես, որ այդ մարդիկ դուրս են մնում երկրի քաղաքական կյանքից։
Իսկ թե ովքեր են դառնում երկրի քաղաքական ու տնտեսական, միջազգային կյանքի ղեկավարողներն ու որոշողները, ովքեր կուսակցական ցուցակներով լցվում են Ազգային Ժողով, կառավարություն, աչքներիս առաջ է։
Մենք 30 տարի տեսել, այսօր էլ ամեն օր շարունակում ենք տեսնել կուսակցականների գերակշիռ մասի հնդուհավային կեցվածքներն ու լսում ենք նրանց անգրագետ, անկապ բլթոցները, երրորդ-չորրորդական նշանակության բարձրացրած հարցերն ու նախագծերը։ Մենք տեսնում ենք օր-օրի միջազգային ասպարեզում հեղինակազրկվող մեր երկիրը, ոչնչացող գյուղատնտեսությունն ու արդյունաբերությունը, ոչնչացվող բանակը, հետին պլան մղված ՀԱՅՐԵՆԱՍԻՐՈՒԹՅԱՆ գաղափարը։
Այնպես որ, պահանջվում է վերանայել ընտրական օրենքը, թույլ տալ, որ անկուսակցական քաղաքացին կարողանա ինքնաառաջադրվել։
Հ․Գ․ Կարծում եմ, բոլոր շահագրգիռ ընկերներս պետք է բարձրացնեն այս հարցը։

ՄԵԼԱՆՅԱ ՊԵՏՐՈՍՅԱՆՑ