Ադրբեջանցիները շարունակում են դիրքավորված մնալ ՀՀ տարածքում․ դիմել ենք համայնքապետին ու զինվորականներին, որ սահմանապահ գյուղերի բնակիչներին զենք տան․ Արգամ Հովսեփյան

Մարտի 29-ից ադրբեջանցիներն ինչպես առաջ էին եկել Տեղ գյուղի ուղղությամբ ու դիրքավորվել ՀՀ տարածքում, նույն դիրքերում շարունակում են մնալ։ Վերջին օրերին որևէ փոփոխություն այդ առումով չի եղել։ «Փաստինֆո»-ի հետ զրույցում այդ մասին ասաց Արավուսի նախկին վարչական ղեկավար Արգամ Հովսեփյանը։

«Որտեղ եկել դիրքավորվել են, ակտիվ կերպով ինժեներական աշխատանքներ են անում։ Մենք էլ նույնպես՝ ամրացնում ենք մեր դիրքերը»,-ասաց Հովսեփյանը՝ հավելելով, որ բնակիչները բանակի կողքին են։

«Բոլորս բանակի կողքին կանգնած ենք, բայց խնդիրն այն է, որ զենք չունենք։ Սահմանապահ բնակավայրերի այն բնակիչները, ովքեր զենքից օգտվել կարողանում են, պետք է զինված լինեն, դա անհրաժեշտություն է։ Այդ հարցով վերջերս նորից դիմել ենք համայնքապետին էլ, զինվորականներին էլ․ սպասում ենք տեսնենք ինչ կլինի»,-նշեց Հովսեփյանը։

Արավուսի բարձունքներում՝ երեք կողմից, թշնամին դիրքավորված է 2020թ․ 44-օրյա պատերազմից առայսօր։ Գյուղի թիկունքում Տեղն է, մնացած երեք ուղղություններում դիրքավորված է թշնամին։ Գյուղին հարակից բարձունքներում թշնամին 13 դիրք է դրել։
Արավուսի դաշտերի մի մասը՝ 168 հա-ից 68 հա-ն, թշնամու վերահսկողության տակ է արդեն 2,5 տարի։
Եթե մինչև 2020թ․ պատերազմը գյուղում զարգացած էր թե՛ անասնապահությունը, թե՛ դաշտավարությունը, հիմա անկումային վիճակում են երկուսն էլ։

«Գյուղատնտեսական ոչ մի աշխատանք չենք անում․ դեռ որ հունձին ենք սպասում։ Դաշտերի մի մասը թշնամու վերահսկողության տակ է, մնացածն էլ՝ ուղիղ նշանառության։ Անասուն էլ համարյա չկա։ 80 տոկոսով կրճատվել է անասնագլխաքանակը։ Եթե մինչև պատերազմն ամեն մի տնտեսություն 50-60 գլուխ անասուն էր պահում, հիմա 1 կամ երկու կով է մնացել։ Վաճառել են, պահելու հնարավորություն չկար արդեն»,-ասում է Արավուսի նախկին ղեկավարը։

Հովսեփյանը նշում է՝ նախքան Գորիս-Ստեփանակերտ երթուղու փոփոխությունը, թշնամին Տեղի այդքան մոտ չէր դիրքավորված։ Ռուս խաղաղապահների՝ այդ հատվածից դուրս գալուց հետո ադրբեջանցիներն անմիջապես առաջ են եկել ու ակցանի մեջ առել նաև Տեղը։ Հիմա հայ ու ադրբեջանցի դիրքապահները դեմ դիմաց են կանգնած։

Աղբյուր` Փաստինֆո