Որ պարագայում Իրանը կդիմի շատ կոշտ քայլերի, ընդհուպ ռազմական բախման․ Մանրամասնում է իրանահայ քաղաքական վերլուծաբան Արտույտ Զոհրաբյանը

Ակնհայտ է , որ տարածաշրջանում լարվածությունը շատ ավելի է մեծանում, ու ակնհայտ է, որ Ադրբեջան-Հայաստան կոնֆլիկտի ֆոնին հաջորդ լայնամասշտաբ պատերազմը մեծ ներուժ ունի վերածվելու տարածաշրջանային պատերազմի։

Ո՞ր դեպքում Իրանը կմիջամտի ռազմական գործողությունների մեջ հարցի պատասխանը <<Իրավունքը>> փորձել է ստանալ Իրանի մեր հայրենակցից՝ քաղաքական վերլուծաբան ԱՐՏՈՒՅՏ ԶՈՀՐԱԲՅԱՆԻՑ, ով նախ նկատեց․

-Նախ, Իրանը մինչեւ վերջ ամեն ինչ անելու է, որպեսզի տարածաշրջանում կայունություն ապահովվի, խոսքը գնում է Ադրբեջան-Հայաստան կոնֆլիկտի շուրջ կայունությանը։ Իսկ  ինչ վերաբերում է հարցին, որ եթե այնուամենայինվ, երկու երկրների միջեւ կոնֆլիկտը հասնի գագաթնակետին եւ վերածվի ռազմական բախման, ապա այդ պարագայում, կարծում եմ, որ բոլորին հայտնի է, թե ինչ քայլերի կդիմի Իրանը։ Իրանի որեւէ խոսք պարզապես քաղաքական ենթատեքստ չի ներառում, պաշտոնական Իրանի ցանկացած խոսք՝ գործ է։ Իրանը բազմիցս հայտարարել է, որ սեփական երկրի  սահամանների ապահովվության միտված ցանկացած խախտում՝ համարժեք արձագանք կստանա։

Ամփոփելով խոսքս, կարող ենք արձանագրել հետեւյալը, Իրանը կողմնակից չէ ռազմական ճանապարհով հարցի լուծմանը, բայց, եթե Աստված մի արասցե Ադրբեջան-Հայաստան կոնֆլիկտը սահմանում վերածվի ռազմական բախման՝ Իրանը վստահաբար կմիջամտի։ Բայց այս պահին Իրանը ամեն բան անում է, որպեսզի տարածաշրջանը խաղաղ պահի, բայց կան կարմիր գծեր, որոնց հատման պարագայում՝ Իրանը կդիմի շատ կոշտ քայլերի, ընդհուպ ռազմական բախման։  

-Պարոն Զոհրաբյան, կցանկանայի անդրադառնայիք նաեւ Իրանում առկա ներքաղաքական իրադարձություններին։

-Իրանում, իրականում որեւէ ներքին խժդժություններ տեղի չի ունեցել, իսկ այն իրադարձությունները, որոնք տեղի ունեցած երկրում ապակայունացում ստեղծելու համար, ընդամենը դրսի ուժերի կողմից ներդրված միջոցներ էին Իրանին ճնշելու համար։ Ինչը նորություն չէր Իրանի համար, քանի որ Իսլամական հեղափոխությունից ի վեր Իրանը պարբերաբար առերեսվել է նման ճնշումների։ Բնական է, որ Իրանի նման հզոր եւ ինքնուրույն երկիրը, այսպես ասած, խանդ է առաջացնում արեւմտյան, անջատողական ուժերի համար, ովքեր փորձում են տարածաշրջանը ծառայեցնել իրենց շահերի համար։ Եվ այդ ճանապարհին նրանք ջանք չեն խնայում Իրանում տարատեսակ անկարգարգություններ ծրագրավորելուն ուղղված, սակայն Իրանը մեկ անգամ եւս ապացուցեց, որ Իրանի համար չկան անլուծելի խնդիրներ։

Զրույցը՝ ԻԼՈՆԱ ԱԶԱՐՅԱՆԻ