Մխչյանի դպրոցում աշակերտներին հարկադրաբար թմրանյութ հյուրասիրելու դեպքից հետո աշակերտները մինչ օրս չեն հետազոտվել

Արարատի մարզի Մխչյան գյուղի դպրոցում՝ աշակերտներին հարկադրաբար թմրանյութ հյուրասիրելու դեպքից հետո դպրոցի աշակերտները մինչ օրս չեն հետազոտվել։

Euromedia24.com-ին նոր մանրամասներ են հայտնի դարձել միջադեպից։ ՔԿ-ից մեզ հայտնել են, որ Մխչյանի դեպքից հետո միայն մեղադրյալներն ու տուժողներն են ուղարկվել տոքսիկոքիմիական հետազոտության(մազի անալիզի), հասկանալու համար թե օրգանիզմում սպիտակ զանգվածն ինչ է, մինչդեռ դպրոցի մյուս աշակերտները չեն հետազոտվել։

Հետազոտվածների փորձաքննության արդյունքները, թեև օրեր են անցել, բայց դեռ չի ստացվել։

Հիշեցնենք՝ օրեր առաջ տեղեկություն տարածվեց, որ Մխչյանի դպրոցում բարձր դասարանցիները 4-րդ դասարանցիներին ստիպողաբար թմրանյութ են հյուրասիրել։ Դրանից հետո երեխաների մոտ կախվածություն է առաջացել, և նրանք սկսել են տնից գումար գողանալ՝ կրկին նույն աշակերտներից թմրանյութ գնելու նպատակով։

ՀՀ քննչական կոմիտեից հայտնել էին, որ դեպքի առնչությամբ 4 անձի նկատմամբ հանրային քրեական հետապնդում էր հարուցվել:
Մեղադրյալներից 2-ի նկատմամբ կիրառվել է վարչական և դաստիարակաչական հսկողություն, մեկի նկատմամբ տնային կալանքը, գրավը և բացակայելու արգելքը, 4-րդի նկատմամբ կիրառվել է տնային կալանք։