Ադրբեջանի դեմ միջազգային գանգատներից հրաժարվելով՝ հետ ենք քաշվում մի խաղադաշտից, որտեղ հաղթող ենք եղել. Սահակյան

Իրավական գործընթացներն այնքան կարևոր են, որ խաղաղության նախաստորագրված պայմանագրի տեքստում դրա մասին դրույթ կա։ Այս մասին, այսօր՝ հոկտեմբերի 1–ին, Բաքվում պահվող հայ գերիների և պատանդների իրավունքների թեմայով քննարկմանն ասաց Միջազգային համեմատական իրավունքի կենտրոնի նախագահ Սիրանուշ Սահակյանը։

Նա նշեց, որ միջպետական գանգատներից հրաժարվելն այնքան կենսական, առանցքային, կարևոր հարցադրում է եղել, որի շուրջ տևական բանակցություններ են ընթացել, ադրբեջանական կողմն իր ողջ բանակցային ուժն օգտագործել է այդ դրույթն ամագրելու համար։

«Ադրբեջանական կողմը, ըստ էության, երկու բան է արել. առաջին՝ գործադրել է իր բանակցային ներուժը՝ պարտադրելու համար միջպետական գանգատների հետկանչ, երկրորդ՝ դա ուժեղացնելու համար նախաձեռնել է նաև արհեստական դատական գործընթացներ, որպեսզի և ճնշում գործադրի այդ դրույթն ամրագրելու համար։

Սա արդեն ցուցադրում է, թե Ադրբեջանի շահերը որտեղ են, որ կարող են վնասվել։ Այսինքն, ցանկացած իրավական գործընթաց վնասում է Ադրբեջանի անվտանգությանը, որովհետև ճշմարտությունը չեզոքացնում է Ադրբեջանի ագրեսիվ քաղաքականությունը, ուստի մենք տեսնում ենք, որ այս ողջ գործելակերպի միակ հակաթույնը իրավականն է»,- նշեց իրավապաշտպանը։

Ըստ նրա, մեծ հաշվով, Հայաստանը չի կարողացալ հաղթաթղթեր ունենալ ռազմական ոլորտում, չի կարողացել դա ապահովել քաղաքական ոլորտում։

«Միակ ոլորտը, որտեղ մենք հաջողությամբ գործընթացներ ենք վարել՝ թե ընթացող միջպետական գործընթացները, թե անհատական, դա հենց իրավական է։

Ստացվում է՝ մենք հետ ենք քաշվում մի խաղադաշտից, որտեղ հաղթող ենք եղել, փորձում ենք մնալ մի խաղադաշտում, որտեղ մեզ շատ վատ ծեծել են, ավելին՝ ազգային ինքնասիրության հետ կապված հարցեր են դրել»,- ասաց Ս. Սահակյանը։