«Պարոն Խուդոյանի՝ ԲՈԿ քննարկմանը չներկայանալը ոչ այլ ինչ էր, քան նահանջ».Հրանտ Ավանեսյան

Խուդոյանը դեմարշ է ուղղել ողջ հոգեբանության հասարակության դեմ

Օրերս, Newsmedia-ն անդրադարձել էր Երեւանի պետական մանկավարժական համալսարանում գործող հոգեբանության մասնագիտական խորհրդում Մարատ Դուրյանի պաշտպանած ատենախոսության շուրջ բարձրացած  արհեստական աղմուկին, որի հետ կապված էլ, Բարձրագույն որակավորման կոմիտեն Մանկավարժական համալսարանում հրավիրել էր քննարկում:

Քննարկմանը մասնակցում էին ԲՈԿ նախագահ Սմբատ Գոգյանը, Խ. Աբովյանի անվան Մանկավարժական համալսարանի Կիրառական հոգեբանության ամբիոնի վարիչ Սամվել Խուդոյանը, ԵՊՀ Ընդհանուր հոգեբանության ամբիոնի վարիչ Հրանտ Ավանեսյանը և այլ գիտնականներ:
Քննարկման ավարտին, խնդրին վերջնական լուծում տալու համար, որոշվել էր երկուշաբթի օրը՝հունիսի 24-ին, հարցը քննարկել նաև ԲՈԿ-ում՝ նախ եւ առաջ այս թնջուկին վերջ տալու, ինչպես նաեւ մշակելու մեխանիզմներ՝ հետագայում նման անհեթեթ իրավիճակների մեջ չհայտնվելու համար:

Սակայն ի զարմանս բոլորի, այսօր հանդիպմանը չէր ներկայացել Մարատ Դուրյանի ատենախոսությունը «հայոց հարց» դարձրած Սամվել Խուդոյանը, ում բացակայությունը , ինչպես Newsmedia-ի հետ զրույցում նկատեց պարոն Ավանեսյանը, հետեւյալ մեկնաբանության տեղիքն է տվել հոգեբանական հանրության շրջանում.

-Դե ինչպես գիտեք. հունիսի 20-ին, մեր հանդիպումն ավարտվեց նրանով, որ պարոն Գոգյանը մեզ՝ ինձ եւ պարոն Խուդոյանին հրավիրեց ԲՈԿ: Եւ ես, ինչպես որ խոստացել էի մեր նախորդ հանդիպմանը, նախապատրաստել էի վերջին տաս տարվա պաշտպանված ատենախոսությունների տաս-տասներկու նմանատիպ նյութեր, որոնց թվում առկա էին նաեւ պարոն Խուդոյանի ղեկավարած դիսերտացիաները:

Նմանատիպ նյութեր պետք է բերեր նաեւ Խուդոյանը, հասկանալու՝ արդյո՞ք նմանատիպ դրվագներ կրկնվում են ատենախոսություններում, եւ արդյո՞ք դրանք գրագողություն են համարվում, թե ոչ: 

Ես մոտ կես ժամ շուտ գնացի եւ սպասեցի պարոն Խուդոյանին, որպեսզի մենք միասին մտնենք պարոն Գոգյանի մոտ, որ հանկարծ պարոն Խուդոյանը այլ բաներ չմտածի: Մեկ ժամ սպասելուց հետո, պարոն Խուդոյանը այդպես էլ չեկավ. այնտեղ ներկա էին պարոն Գոգյանը, պրոֆեսոր Աղաջանյանը, եւ ես:

Իսկ  տվյալ պարագայում, պարոն Խուդոյանի ԲՈԿ չներկայանալը ոչ այլ ինչ էր, քան նահանջ: ԲՈԿ նախագահին եւս,  զարմացրել էր պարոն Խուդոյանի բացակայությունը:

-Դուք նշեցիք, որ պարոն Խուդոյանի չներկայանալը ոչ այլ ինչ էր, քան նահանջ: Այսինքն, նա վստահ է՞ր, որ ներկայանալով եւ առերեսվելով Ձեր ներկայացրած փաստերի հետ՝ ստիպված է լինելու ընդունել իր նահանջը:

-Այո, սա դեմարշ էր պարոն Խուդոյանի կողմից: Ես գիտեմ, որ պարոն Խուդոյանի չգալու պատճառը դա էր. նա գիտեր, որ ես այդ նյութերը կբերեմ: Նրա այս պահվածքը, նորից եմ կրկնում. դեմարշ էր, ուրիշ ոչինչ:

-Դեմարշ, ուղղված ո՞ւմ դեմ:

-Ասեմ, պարոն Խուդոյանը դեմարշ է ուղղել ողջ հոգեբանության հասարակության դեմ, այլ մեկնաբանություն չի կարելի տալ պարոն Խուդոյանի բացակայությանը:

Պատրաստեց՝ Նոնա Ադամյանը

Հ. Գ 

Հաջորդիվ՝ կփորձենք ներկայացնել նաեւ ԲՈԿ նախագահ Սմբատ Գոգյանի մեկնաբանությունը՝ ստեղծված աննախադեպ իրավիճակի շուրջ: